大企業越嚟越注重危機管理，不過，即使如數一數二嘅地產大藍籌，當遇到大股東因為家事影響企業名聲，公關大員一樣企喺度唔識反應。講到市場上處理危機經驗最豐富嘅，華華首選新世界發展（017）董事總經理助理關則輝（CF）。數佢當年處理過嘅「危機」，包括國泰空姐工潮、新巴勞資雙方衝突……CF除咗幫企業化危為機，最近華華知道，佢仲將一身公關絕技傳授畀一班中年人，幫佢哋重新建立事業。
得到CF傳授武功嘅係一班四五十歲車衣女工。CF話，班女工喺七八十年代撐起香港工業半邊天，不過，隨着工業北移，呢班女工空有一門手藝，無用武之地，一係迫住轉行、一係屈喺屋企，冇晒自信。於是慈善團體樂群社會服務處出手，社區投資共享基金（CIIF）籌錢，為呢班女工搞社會企業做生意。CF就做軍師，教佢哋建立品牌。
頭耷耷講到有團火
CF話，班女工其實好有料，只係爭啲營商經驗，又怕失敗，同佢哋傾一粒鐘分享心得，好過就咁捐錢畀佢哋！華華問過班車衣姐姐，佢哋好開心咁話，估唔到有機會接觸到大企業嘅高層，仲要唔使錢有嘢學，呢啲機會唔係人人有㗎！
除咗呢班女工之外，CF話，對象仲有中年裝修師傅、邊緣青年。初初約會嗰陣，幾乎全部都係頭耷耷，冇厘神氣；但當佢哋做出成績，信心返晒嚟嘅時候，雙眼直頭有團火係咁燒㗎！