由第一日坐喺司機位學揸車嗰陣開始，教車師傅已經話揸車轉線嗰陣記得要先望鏡，跟住打燈再望鏡，望清楚先好切線，到咗今日我仲好記得呢個訓示。但揸車揸耐咗，就發覺越嚟越多人忘記咗呢項規條，搞到好多意外都係因為咁發生。
話說早兩晚由公司揸車入屯門探朋友，沿途一直都相安無事，但去到龍翔道近舊亞視大廈附近，我左前方不遠處嘅一部的士，可能見前面巴士行得慢，所以想爬頭。不過呢位司機大佬好似覺得條路只係得佢一架車咁，喺我同佢極接近嘅情況下，燈都唔打就由中線切入快線，唔只累到我要急煞，仲差啲搞到後面部小巴撞埋嚟。
有時我真係好想問吓呢啲咁缺德嘅駕駛者，係咪可以完全唔顧其他人嘅安全亂咁切線？先打燈畀其他道路使用者知你要切線，等大家都有個心理準備都好吖，唔係有咩意外就累人累己囉！
記者：丹尼斯