金管局總裁任志剛成日被人話人工貴，但佢擔任金管局總裁以嚟，做咗唔少嘢。好似噚日，金管局攞咗亞洲銀行家金融服務業監管成就獎，華華記得97年，任總已經以個人身份攞咗《Euromoney》頒嘅中央銀行家獎，今次帶領金管局，以機構身份攞獎，任總就算真係好似傳聞所講出年退休，都可謂退得光榮。
艾爾敦做評委主席
其實，金管局攞獎又點可以唔提任總，皆因佢自己都攞唔少銀行家獎項，金管局經歷97年金融風暴，用千億入市打大鱷，打鱷舵手之一任總因此聲名大噪，加上推行亞洲最先進嘅銀行同業即時支付結算系統等，走先鄰居幾步，所以喺96、97年都攞到《Euromoney》全年最佳亞洲中央銀行家獎，95年又攞過香港銀行學會頒嘅銀行家年獎。
至於今次頒畀金管局嘅亞洲銀行家金融服務業監管成就獎，係由《亞洲銀行家》搞嘅，評選搵咗前獅子行大班、家陣嘅廸拜國際金融中心管理局主席艾爾敦，做評委會主席，行內人睇行內人，要求梗會嚴格啲，結果，評委會認為金管局喺年內成就、監管報告嘅質素，同遠見及策略等幾方面，都係區內最積極同最善用現代監管方法嘅監管機構。
頒獎禮喺越南舉行，任總代表金管局去領獎，佢喺頒獎禮上話，金管局會繼續「迎接瞬息萬變嘅金融環境所帶嚟嘅新挑戰」。𠵱家任總面對兩大問題，對外就係美國次按風暴；對內呢？任總年初提過，人員流失造成壓力，加薪留人又怕招人話柄，都咪話唔愁，但華華最關心係，若然任總下年退休，會由邊位仁兄接棒？
電郵：mailto:[email protected]