政治人物牽涉入性醜聞，屢見不鮮，早已不算係大新聞，除非案中主角係克林頓（與見習生有染），或者係薩爾科齊（戴綠帽）呢類總統級數人物啦。但今次美國紐約州長斯皮策召妓，因而辭職，特別令人注目。
州長，市長召妓，喺美國並不稀奇，稀奇嘅係以斯皮策呢位咁有野心，家族咁有錢，讀書咁叻（普林斯頓、哈佛法學院）嘅美國精英，明知在美國制度下，每次召妓用四五千美元，必然會引起財政部、國稅局調查（因為銀行會主動滙報大戶口之異常交易），最後必定走唔甩，一旦曝光，就會身敗名裂，點解佢仲會冒險召妓呢？斯皮策被紐約女權組織視為掃黃英雄，呢勻就真係英雄難過美人關，最叻嘅男人就係死在女人身上。
第二個召妓唔奇，斯皮策平時滿口仁義道德，致力打擊貪污，口口聲聲保護女權，在佢大力推動、支持之下，紐約州通過法律，將「海外性遊團」列為非法活動，用此法例掃蕩紐約州一啲帶客到東南亞召妓之旅遊社。斯皮策又主張打擊賣淫活動，要先打擊需求，而唔係打擊供應，故此紐約州，召妓男士可最高判刑一年，反而妓女就被視為性罪惡之受害人，可以放過，一改以前警察專拉扯皮條、拉妓女，放過男嫖客之風。
表面上滿口道德，保護女性，暗地裏實為恃財行兇，好色之徒，斯皮策之偽善面孔，實在令人作嘔，佢一聲辭職，紐約交易所內歡呼聲四起，前高層（被斯皮策調查而辭職）甚至開香檳慶祝。呢位州長不特止偽善，亦都利用朋友，心地陰險，佢在華盛頓五月花酒店訂下817號房，用佢老友記GeorgeFox嘅名字，呢位霍士先生平時為斯皮策籌集政治捐款，點知道自己個名會俾老友用作召妓之用吖！
斯皮策召妓前後十年，點會被揭穿呢，皆因賣淫集團Emperor'sClub透過一間QAT公司收錢，QAT在紐約滙豐銀行開戶口，收埋不少錢，引起滙豐懷疑，去年秋天向財政部報告，稅局展開調查，跟住發現斯皮策轉錢入滙豐QAT戶口，順籐摸瓜，斯皮策咁就瓜咗。要記得，斯皮策以前做檢察官嗰陣調查過紐約滙豐嘅呢。