自從去HighTea成為熱潮，酒店CoffeeShop變成了觀光點，「High」字亦從此變成了動詞。經過茶記會問：「High唔HighTea？」多年前，本本飲食雜誌深明港人消費力逐漸提高，力谷酒店HighTea介紹，搞到個個仆去試。好心做壞事並唔係指佢教錯人（其實係叫AfternoonTea），問題在於此乃貴族玩意，一普及就失真。
攝影：譚盈傑
http://appleblogpaper.blogspot.com
aboutme:
花樽
明明係英文名，但俾人譯了日文，幫日本公司打完工，多了個名叫「花樽」。至於本身英文係乜，自己諗。太愛吃、食不停、有機會周圍去，都立定有得食好食的宗旨。永遠銘記到年紀大要戒口時，就真係想吃恨遲。
消費得起唔代表識欣賞
早兩日於家中百無聊賴，提不起勁工作，於是打電話搵腳出街Tea一Tea。相約盧覓雪（Michelle）出去HighTea，佢揀地方。怎料得到佢話：「上我屋企啦！間間酒店嘅HighTea都變晒質，完全已經唔係嗰回事。我寧願去ZoeCakeShop買餅，冲靚茶你飲，嚟我屋企傾偈仲舒服。」其實我懶理係半島定屋企，只要唔使通街逼，有個地方舒舒服服嘆吓茶，已經係HighTea的最終目的。
上到Michelle家，茶、餅同音樂都已經一應俱全。要跟貴族式有氣派的AfternoonTea相比，當然係兩碼子的事，但悉心的安排，配合午後的陽光、微微的凉風，加添了一份酒店欠奉的溫暖。Michelle不願妥協的理由我可以理解：「與其用$200嘆個變質嘅AfternoonTea，所得與付出不相稱，我唔好用啲錢買我鍾意嘅Cake食？AfternoonTea係當年貴族嘅社交文化活動，根本就唔可以平民化，更唔應該普及。」以前阿爸阿媽年代就話唔捨得使，唔敢亂入大酒店，𠵱家個個都講生活質素，好難唔普及。Michelle繼續一肚牢騷：「$200個個都消費得起，識欣賞卻又係另外一回事，正如飲紅酒嘅人未必識飲，要飲就要學識點欣賞。唔識欣賞亦毋須勉強，好似80年代我約明星做訪問，狄龍同姜大偉會揀太子道咖啡屋，而張國榮同陳百強就一定揀文華酒店。狄龍唔係無錢，只係出身草根，佢鍾意係一杯街坊咖啡。」緣起邊度飲茶的問題，卻成為我倆整個下午談論的話題。
青瓜三文治先係正宗
我認同唔係話無錢唔畀嘆AfternoonTea，問題只係個個人去我又去，他們根本不明白整件事所帶來的樂趣，更不會學習如何投入。道理好似打麻雀用自動洗牌機咁，根本就會失晒打牌的樂趣。平日講嘢大大聲的Michelle都識得去酒店壓低聲線：「至弊隔籬嗰啲表叔嘈嘈閉，覺得有錢大晒呢！AfternoonTea文化最緊要講格調、夾人腳，以前同吳君如、章小蕙去文華HighTea，見到嘅係任姐仙姐、鍾楚紅同陳方安生。雖然我當年仲係娛記，但大家會識得保持距離，唔會偷影、唔會八卦。同班姊妹睇吓靚人，感受吓幽靜嘅環境，享受一個完全忘掉工作嘅午茶。」說得對！入鄉不能隨俗係中國人的醜習。Michelle覺得要投入就先要了解AfternoonTea的文化：「唔使話要有貴族禮儀，但都要着得斯文得體。Fingersize咁大嘅食物，用架分開3層，都係想你慢慢品嚐。有人見到青瓜三文治就嫌Cheap，但青瓜係英國最普遍嘅小食，所以有青瓜三文治先係最正宗嘅AfternoonTea。」講起三文治，另一必提的食物當然係文華的RosePetalJam，揸Scone食令人一試難忘，Michelle更有樽在家以表支持，隨時攞出嚟食以解心癮。
唔應該出名的半島
我要求低，心目中幾間龍頭大酒店都感覺不俗。何況Michelle都認為佢哋咁多年嚟，食物都能保持水準，區區幾枱人客就動搖嘆AfternoonTea的動力？「食物係其次，格調先係最重要，人客、燈光、餐具、裝修同音樂都會影響整個環境嘅格調。格調無分高低，我唔理佢主題係Modern定古典，總之就要有格調，要令人感覺有氣氛。」間間都唔啱心水？心目中一間Perfect的酒店都無？「文華未裝修前係我最鍾意嘅，但𠵱家梳化窄咗、張凳高咗，似開會多過似Tea，佢張CoffeeTable改番矮啲就好；Ritz-Carlton入面間ChaterLounge本來都好好，但又執埋；間間餐廳仔扮AfternoonTea就無謂講，其他幾間大酒店都欠格調；唯獨半島保持一貫水準，樓底夠高環境最好，但諗到要同日本仔、自由行排隊等位，就失真啦。」好矛盾，真係好矛盾！明明係最好，應該值得推介，但又唔能夠出名晒大熱。唔知半島有無打算擴充，諗諗計整多個一模一樣的大堂出來呢？
查詢：
半島酒店（ http://hongkong.hk.peninsula.com）
東方文華酒店（ http://www.mandarinoriental.com/hongkong）
ZoeCakeShop（28921166）
最新回應
Eugene：「一路聽人講半島HighTea好正，我都想試吓好耐，可惜一路都無時間。不過，200幾蚊原來得幾件三文治仔，又好似唔係幾化算。」
Janice：「我去過FourSeasonsHighTea，大概$250一個人左右。雖然食物就一般，但環境幾清幽，有人現場彈琴伴奏，同朋友傾偈都幾舒服，好過去半島排隊啦。」
Catherine：「𠵱家個個都有錢，好難唔畀AfternoonTea大熱㗎喎！不過好彩𠵱家好多地方都有得食，我去過ifc食都唔錯。」
相關超連結
http://coffeetea.about.com
這個網址有齊辨清何為HighTea及AfternoonTea的相關歷史，更有大量關於茶的詳盡資料。不同品牌、不同選購地方、不同混茶的做法等都清楚列明，包羅萬有，係一個茶癡的好去處。
http://www.viewlondon.co.uk/restaurants/restaurants-for-afternoon-tea-in-london-recommended-london-106.html
想嘆終極正宗AfternoonTea，當然要跑去倫敦一趟。這個網址推介多間英國倫敦的AfternoonTea好去處，地址、環境等資料都十分詳盡，大家可跟網址一試。
