一連三場「港樂鄭中基梁漢文演唱會」前晚在紅館舉行完畢，鄭中基竟被男歌迷稱讚為「全世界最靚仔」，他也忍不住大笑。問到其女友蔡卓妍（阿Sa）是否低調捧場，他即發誓指女友已SMS給他表示沒空。
鄭中基（Ronald）與梁漢文（Edmond）在尾場個唱又繼續搞爛gag，博得喝采與笑聲，二人合唱英文歌前，Edmond問觀眾知否他們要唱甚麼歌，Ronald說：「如果B哥哥（鍾鎮濤）喺度佢實知，因為係『B知s』。」
當Ronald彈結他時，有歌迷大叫：「你好靚仔。」他大笑說：「呢句嘢我等咗好耐。」其餘歌迷也陸續大叫「你好有型」、「歌王」及「歌神」之類，Ronald說：「開心死，為咗更靚，我會考慮整容。驚我靚過龍？唔會。」忽然一男歌迷大叫：「你係全世界最靚仔。」他笑說：「咁嘅大話都講得出，多謝你。」但有歌迷大叫「阿Sa」，Ronald卻充耳不聞，叫歌迷安靜聽他唱《絕口不提！愛你》。
誓做鋼琴王子
到Edmond出場彈鋼琴，歌迷叫他靚仔，他即說：「靚仔冇用，又唔係全世界最靚仔嗰個。」全場大笑，有女歌迷叫他鋼琴王子，Edmond才受落謂：「呢個啱聽。」
許志安、陳慧嫻、李璨琛與女友等前晚都有捧場，Edmond女友晚晚有到，惟不見蔡卓妍，Ronald在慶功宴上舉起三隻手指說：「佢SMS覆我話祝演出成功，話唔得閒，真係冇嚟，我發誓。」Edmond謂稍後放假兩星期，會否偷偷去結婚？他說：「唔會，應該唔會去第二度。」問Ronald何時結婚，他說：「我變咗全世界最靚仔，啱啱先踏入花樣年華，冇諗過。」
採訪：王連連
攝影：陳順禎