日職聯只係打咗兩輪，浦和紅鑽嘅德國籍教頭奧錫克，已經閃電食咗隻「無情雞」。雖則我求大俠都好同情佢，但鬼叫紅鑽係日職聯最受歡迎球會，又係前季日職聯同應屆亞冠盃冠軍，球迷點可能接受佢哋開「咧」兩戰全敗兼零入球，算佢唔好彩啦！
紅鑽今季雖則走咗小野伸二、長谷部誠同埋華盛頓，但就簽入三都主、梅崎司、高原直泰同埋艾美臣，實力唔比上季差。好衰唔衰，三都主季前重創，邦廸則仲養緊傷，加上高原直泰同艾美臣未夾到兼冇態，開「咧」後班波完全冇料到；先輸畀橫濱水手0:1，繼而再負名古屋鯨魚0:2，連埋上季成績，跨季7場聯賽不勝。於是佢哋高層喺禮拜日召開危機會議，決定叮走奧錫克，由佢助手安高斯頂上，奧錫克今次都可謂俾鯨魚食咗囉！
其實，紅鑽之前喺德國籍教練巴治禾帶領之下，由二線變一線球隊，仲喺06年攞埋日職聯冠軍，所以佢哋高層對同樣嚟自德國、兼喺95至96年教過佢哋嘅奧錫克寄望甚大。但佢哋上季喺大好形勢下，俾鹿島鹿角後上搶走日職聯錦標，如果奧錫克唔係幫球隊攞咗個亞冠盃，早就俾人豉椒炒魷，邊可能留到今季！
鹿角正氣球迷至愛
今季日職聯，唔淨止紅鑽，仲有多支強隊都唔係好對辦。好似大阪飛腳咁，佢哋喺季前熱身賽踢到曉飛，仲試過大炒侯斯頓戴拿模6:1，但正式開波就走晒樣，打完3場都未開勝門，所以佢哋教練西野朗個位亦危危乎。至於川崎前鋒都差唔多，對上兩場㩒住對手嚟抽，射門共達45次，惟成績只係1和1負，睇嚟教練關塚隆唔想學奧錫克，真係要諗諗計。
相反，鹿角就正氣得多，喺日超盃揩嘢之後，往後3場贏晒，仲場場淨贏兩球或以上，做咗銀行球隊，鍾意玩日職聯嘅球迷，記得留意住佢哋呀！
你的意見?
●你認為紅鑽教練奧錫克抵唔抵炒呢？
請上 http://hk.myblog.yahoo.com/appleballmen/
〈球蘋家〉留言