凌志豪房力壓歐洲名車，意猶未盡加多兩錢肉緊，踩埋過豪跑界，不過要撼低M3、R8、SL63AMG等一班歐洲陀地，真係少啲本錢都唔掂。呢部號稱凌志史上最快最惡嘅ISF熱辣到港，右軚版全港只得一部，《Car通》獨家借到兩粒鐘試車兼影相，可惜副5,000c.c.V8偈實在太勁，就算載滿人兼跑大斜路，半踩油門已經要收車，423匹實在好難發揮！
記者：徐影龍
攝影：楊錦文
Model：Tina@Chile
鳴謝：富利堡車行
凌志IS車系主打豪華跑格，08矚目作ISF當中嘅「F」，就源指Flagship（旗艦），可想而知新車定位係快車中的快車。今勻行貨反應勁快，左軚版Demo早兩周已到港，但水貨亦不弱，居然班到部喺香港出到牌嘅右軚版返嚟，對應香港左上右落嘅道路原則，右軚當然更易掌握同操控。
基本上行、水貨返嘅車款一模一樣，只係左、右軚佈局不同，筆者首度行近呢部「低調辣跑」，發覺不如在相中見到咁斯文，尤其低角度望番個正車頭，特闊斜網鬼面罩及氣壩，襯着偏橫頭燈，的確充滿霸氣，隱藏式車鰓、19"跑車輪圈及四出式尾喉等，基本上好難喺凌志其他車系搵到，只係車側線條及肌肉感相對低調，加上全黑車身，才出現斯文嘅錯覺而已，相信行貨正式推出後，會有早前公佈嘅紅及藍出現。
山路爬頭 越爬越過癮
雖然試車連拍攝僅得兩粒鐘，不過筆者由灣仔出發直飆渣甸山，遇正塞車都只係用咗10分鐘左右，而且大部份時間耗費在燈位及塞車上；穿過繁忙軒尼詩道，上東廊後猛衝，由白建時道上寶馬山，已急不及待密密爬頭，先做到咁短時間到達目的地。
故意繞過北角再上渣甸山，目的想喺有限時間內，一試ISF之直路升波反應（8速根本無機會試到），以及山路上停停開開之表現。最令我驚喜者，係上山一段路上遇到頗多慢車，喺安全情況下密密爬頭；全車5個人6個袋、FullLoading兼上大斜，停車起步實在得心應手，踩半油已推背發力，爬完頭要速速收油再慢慢跟番前車，過程順暢自然，唔單止423匹V8引擎增添我爬頭自信，右軚車亦係我稍能放肆一下嘅依賴，起碼揸左軚我就唔夠膽咁飆法。雖然感覺上推背爆炸力發得稍遲，不像GT-R般話嚟就嚟，但相反會較易駕馭，溫柔地跑唔驚失控。
一見鍾情白碳纖
論馬力，ISF已勝過寶馬M3、拍住AudiR8、直逼日產GT-R，但同歐洲人鬥豪華亦唔輸蝕；全車皮製內櫳、仿桶椅及軚環，屬頂級豪華，中控台跟IS車系250、350相近的簡約高貴，唔會幾百個掣睇見都煩；輕觸式屏幕功能多多，一眼睇晒前後泊車情況。咪以為水貨車日文介面好難用，試一陣已對各類功能有所掌握，跟車師傅仲話只要改少少嘢，連電視同GPS都收到。
筆者首度見識ISF嘅白碳纖裝飾，的確好靚好有型，在全黑皮車櫳內，以銀白色碳纖點綴，在一貫凌志車系風格上起到不平凡格局，驟眼望到波箱旁嘅白碳纖，好易激發一股爭雄鬥心！
LexusISFSpec：
引擎：4,968c.c.V8
馬力：423hp/6,600rpm
扭力：51.5kgm/5,200rpm
傳動：8前速SPDS半自動波箱，後驅
0至100km/h：4.9秒
查詢：富利堡（28776700）
再試全港最速公路：今次小試ISF，好多性能未有好好發揮，如8波直路大加速、軚盤+/-波甚至連地台油都未試過，實在意難平！皇冠車行Godwin拍拍我膊頭：「唔緊要，借架行貨版畀你揸幾日，一於入赤鱲角試試全港最快公路，再繞屯門公路試彎吖！」咁正？成百萬借幾日？仲要係左軚？驚你呀！詳情請留意下周《Car通》三日兩夜實試報告。