市民嘅公民意識日漸提高，所以政府部門做嘢，真係要醒醒定定。好似海關咁，噚日喺灣仔運動場搞咗個陸運會，仲以「海關競賽齊迎奧運」嚟做口號，好鬼政治正確。海關關長袁銘輝、副關長黃秀培，仲有好幾個助理關長等高層，都畀面到場，為下屬打氣。
不過，有市民向傳媒投訴，批評噚日星期日唔係辦公時間，但為咗接送班海關高層去運動會，動用咗好幾部「AM」車牌政府車輛，投訴人鬧海關咁做係為咗擦鞋兼浪費納稅人金錢。八方嘅同事噚日都有去現場睇過，果然見到好幾部政府車接載海關官員到場出席運動會，之後就各散東西。海關發言人回應話，係按照政府規定使用政府車輛，冇問題喎。