西藏拉薩近日爆發20年來最嚴重嘅騷亂，中央電視台更罕有地播出片段，話啲示威者又放火、又破壞商店，新華社更報道有人被殺。既然咁危險，呢幾日唔少外國政府已經發出旅遊警告，勸喻國民暫時唔好去西藏。不過，唔知係咪西藏問題敏感，向來負責處理呢方面工作嘅香港特區政府保安局，到𠵱家都冇表示。
稱未收到港人求助
過去其他地方一旦發生天災或者局勢不穩，保安局都會例牌回應吓，例如叫啲人避免去啲混亂地方等，但今次就唔同，噚日八方透過政府新聞處問保安局，點解到𠵱家仲未就西藏情況發出任何旅遊警告或勸喻，政府發言人除咗答話入境處至今冇收到當地港人求助外，就係話暫時冇其他嘢可以補充喇。咁又係，如果特區政府叫人暫時唔好去，咪即係間接話中央控制唔到西藏局勢？又係好難搞嘅。
不過，如果有港人考慮緊仲去唔去西藏旅行，特區政府又冇意見，惟有自求多福。民主黨李永達就話，既然傳媒報道講到西藏封城，特區政府應該發出旅遊建議。不過，好似高達呢等無（回鄉）證人士，莫講話西藏，連去深圳做腳底按摩都唔得啦。