舊同學聚會，總係會埋怨工作繁瑣、壓力大，究竟呢個世界，有冇一份令人開心嘅工作呢？前排喺朋友聚會，認識咗惠康超市採購總監盧耀強，佢成日都要周圍去試飲試食，捐窿捐罅搵平靚正嘅食物，睇佢嗰次飯局中品嚐美食嘅表情，加埋佢「健壯」身形，就知佢應該好enjoy呢份工作。
原來佢仲識煮嘢，仲教我如果想辟走雪藏雞之類嘅雪味，只要煲一煲放咗兩湯匙糖嘅水，然後放隻雪藏雞落去，浸幾浸之後攞番上嚟，就可以辟晒啲雪味，再用嚟煮餸。至於點解咁樣可以辟雪味，佢用咗每一個阿媽都會咁樣回答嘅答案：「個個都係咁做，有效咪得囉。」又好似阿媽教人煲湯咁，落鹽份量唔係知幾多毫克，而係「用手拿一小渣」就掂。
不過，註冊營養師邱美玲就嘗試從科學角度解釋。佢話，原因同水嘅特質有關；物理上嚟講，低濃度嘅液體，會走向高濃度嘅液體，雪藏雞嘅雪水主要係清水，濃度較低，而糖水濃度較高，因此，雪藏雞嘅雪水就會由隻雞滲出去啲糖水度，所以雞嘅雪味就會相對少咗。
逢周一至周四刊出