百歲高齡嘅六叔邵逸夫早排入院，近日更傳出病情惡化嘅消息，傳媒大為緊張，日前連TVB自己嘅新聞部，都派出採訪車去醫院。不過，六嬸方逸華一位身邊好友噚日卻同八方講，六叔已經好番好多，如無意外仲可望日內出院㖭。
陳志雲：有需要會去採訪
六嬸呢位好友話，近日聽到六叔病情有變，即刻打電話畀六嬸問候六叔，點知六嬸叫佢唔使咁擔心，因為六叔已經冇乜事，相信好快可以出院，仲話院方可能最快噚晚或者今日批准六叔返屋企。
佢又引述六嬸話，六叔初時入院，只係因為老人家有啲咳，作感冒；話晒六叔已經成百歲，有乜頭暈身㷫都會入院畀醫生睇睇，以求安心，但𠵱家已經冇乜大礙。
TVB總經理陳志雲前晚過大海，喺澳門睇演唱會時，亦再次強調六叔冇事，佢仲自行估計六叔已經出咗院。佢話：「我有同方小姐（方逸華）傾過，佢話六叔身體健康，好好。」陳志雲呼籲外間唔好胡亂揣測，以免六叔嘅家人擔心。至於上星期五晚連TVB嘅採訪車都去六叔入住嘅聖德肋撒醫院，陳志雲就話：「佢哋咁啱喺附近啫，我同佢哋講咗，有需要會叫佢哋去醫院。」
話雖如此，但一眾記者行家依然唔敢掉以輕心。無綫高層樂易玲嘅平治座駕噚日晏晝兩點鐘一度駛入聖德肋撒醫院，令現場記者緊張起嚟，事後先發現，原來揸車嘅係佢從事建築業嘅丈夫，專程去醫院巡視裝修工程啫。
70歲開始練氣功 養生有道
六叔向來養生有道，聽講以前係頂級人參大買家，70年代閒閒哋每年花幾十萬買人參，後來70歲開始改練氣功，甚至連補品都唔使食，到100歲都仲好精靈，得閒仲會去半島hightea，台慶又拖住港姐主持大局。今勻六叔康復出院，八方建議無綫考慮邀請六叔上《志雲飯局》，或者由傳聞將受力捧嘅欣宜訪問佢，等六叔呢位現代版壽星公同大家分享吓健康養生之道，咁就肯定收視勁升啦。
mailto:[email protected]