聯儲局突然調低貼現窗利率，令市場恐慌情緒加劇，恒指噚日大跌1152點，險守二萬一水平，基金愛股玖龍紙業（2689）更急挫四成，嘉賓同主持都認為後市唔樂觀，唔建議貿然入市博反彈。
翁：翁世權 孫：孫柏文 玲：楊慧玲
孫：今日個市咁亂，係咪大家都走咗去put，有冇人撈call？
翁：窩輪佔大市成交大約23%左右，其實少咗人買輪。今日兩邊都有人買，有人繼續睇淡，有人想博反彈，反映大家都唔知點算好！
玲：我覺得個市應該未見底，後市跌穿2萬點唔奇，不過期指臨尾轉高水，可能係有啲投資者博吓反彈。
孫：今日隻玖紙跌成四成，大家又有乜感覺呢？
玲：呢隻曾經係我嘅愛股，又係我第一隻抽嘅IPO，晏晝之後急瀉，可能係投資者覺得業績差過市場預期，雖然跌咗咁多，但都唔建議散戶心急撈底，我會等到5蚊樓下先或者諗吓，內地新勞工法對佢仲會有困擾。
跌市入招行賺一轉
關公：趁跌入到一手貨，係咁跌都搞到我有啲驚，不過招商銀行（3968）走咗轉賺到啲，臨尾21蚊再入過，23、24蚊有微利就走喇！
玲：我睇個市未跌完，關公竟然仲夠膽玩daytrade。
孫：睇番招行個圖，佢條下跌軌真係靚到不得了，你怕唔怕先？
關：呢隻唔係太驚，不過手上另一隻玖紙就真係嚇死我。
翁：其實近期市場對中資銀行嘅輪冇乜興趣，大家都係睇番國壽（2628）同滙豐（005）嘅輪，雖然招行之前去過40蚊，𠵱家跌咗差唔多一半，唔代表可以返去之前高位，關公都係小心啲好。
--大埔關公個案--
買入價：21元 目標價：24元
止蝕價 ：20元 時期：一星期