由Stockholm坐內陸機，大約兩小時就到達今次試車地點Kiruna。Kiruna位處地域北緯度66°33'嘅北極圈還要北，一踏足呢個北極圈範圍，漫天飛雪，若然係同Honey嚟我會話浪漫，一個人嚟試車就絕對係超級刺激囉！由於係喺傍晚時分到達，入黑後溫度已經降到攝氏零下20度有多。由於未取得大會提供嘅禦寒衣物，單係自己帶嘅衫又邊夠暖？就算戴咗冷手襪，對手都赤赤痛，塊臉就唔使講，吹兩吹再用手指篤都無晒知覺，幾誇張！到達營地已經8點幾，見屋外已有幾部Volvo，包括呢幾年喺香港好受歡迎嘅XC90，更即時用手指喺車尾玻璃寫低個大名做記號，通知全世界我要揸呢部車。誰知寫完覺得自己個名好怪，搵埋幾個人一齊睇都話怪，但就講唔出咩事，點解？到咗第二日食晏，又有怪事，支水飲極都飲唔到，點解……（待續）
記者、攝影：梁美甜
鳴謝：VolvoCarsHK