《西遊釋厄傳2》街機大顛覆玩儲嘢<br>人人爭做二郎神

《西遊釋厄傳2》街機大顛覆玩儲嘢
人人爭做二郎神

敢問在座看官，幾多人曾讀過中國名著《西遊記》？唔知點解近排香港機舖竟吹起《西》學熱！無他嘅，台灣IGS最近新返了《西遊釋厄傳2》，甚麼金角、銀角、牛魔王，邊個最好打？真係人人掛喺口唇邊。不過最顛覆係好多Gamer發現，手下敗將嘅二郎神竟然好打過72變嘅孫行者，不過最開心都係機舖老闆，因為機迷晚晚開波，買卡、儲Lv、儲寶打到癲！

記者：朱崇德
攝影：楊錦文

首加插卡傳承武備

IGS《西遊釋厄傳》已經係10年前街機名作，今次出《西2》最特別之處，除咗系統、遊戲場景角色更靚更完善之外，最惹起話題之處，因為佢係香港街機史上第一隻加入「記憶卡」要素嘅橫向捲軸式動作遊戲！自此每次開局、遊戲角色得以傳承，而且廠商仲好聰明地，加入有Level升級、衣履鞋襪等邊打邊執嘅裝飾配備，玩街機搞到好似在線遊戲咁儲嘢，佢都算係第一隻！

■放工時間最旺場，真係晚晚逼爆。

■10款遊戲角色卡，每張$10；選定角色後就冇得轉，換人要換卡。

■機舖內有極小量遊戲鎖匙扣流傳，主要係熟客先有得送。

■機面有個好似CardReader的讀卡器，就算唔入卡都可以打，不過就冇Level計。

開卡首選二郎神

遊戲開局主要有10個人物角色選擇，家傳戶曉嘅孫悟空、沙悟淨、豬八戒、唐三藏當然係佔首席，不過最估唔到者，竟然係二郎神、蜘蛛精、鐵扇公主、紫衣、小龍女、嫦娥都出嚟趁埋一份。論武功，據原著所述應該係悟空最好打，不過據Gamer表示，二郎神支三叉戟最長，真係一吋長就一吋強，打足3個畫面，對初學者嚟講無論係打嘍囉或大佬級妖怪，唔使下下埋身肉搏，真係有種隔山打牛嘅「保本」技能。所以第一次開卡，好多人都以二郎神做首選！

■求其影一次三人合戰，就已經發現有兩個人用二郎神。

■唐三藏同蜘蛛精係隱藏人物，一定要入卡打先用到。

■玩家可為角色改名，但用普通話拼音，香港人唔多識。

練定神行打妖兵

至於遊戲玩法，基本同一般橫向卷軸遊戲一樣，邊行邊打。不過大膽講句，電腦敵人AI超級強勁，死位滲入、打背脊絕對係佢哋嘅拿手好戲。玩家基本戰略，一定要練好「神行」操作（→＋B），這是一種向前閃身動作，發動時會向前突進2-3個身位，兼且是全身無敵，除有躲避敵人攻勢之餘，嘍囉及大佬級妖怪都會因這下閃身動作而有半秒鐘呆下來，咁你就可以開餐任打！