關於花生浸醋一事，仍有讀者來電郵問，問得相當細緻，左丁山惟有打電話向高人請教，幸好高人有時間聽電話，回答如下：
（一）吃緊西醫血壓藥，是否可以同時吃醋花生？答案係可以，但如個別人士發現問題，要立即睇醫生。
（二）花生浸醋十天之後，是否要倒去白醋，留番啲花生食？答案係非也，浸十天之後，花生可吃，但醋不用倒去，甚至可以飲用（請慎記有胃病之人要小心），以高人邊吃花生邊飲醋之經驗，佢嘅膊頭肌肉鬆軟咗，不再拉緊（即五十肩現象）。
（三）高人話日本人早有以醋浸綠豆，稱為吃醋豆之民間傳統，據講可減少血管栓塞及硬化之機會。
高人再三重申，佢經由氣功師指點吃浸醋花生，以鄧小平之黑貓白貓論驗證，發覺對佢個人確有效用，故此講畀左丁山聽，點知左丁山寫出來，引起不少讀者迴響。高人警誡，病向淺中醫，初發覺有事便要看醫生，不管中醫還是西醫。
病向淺中醫乃係至理名言。大教授Ｋ博士去年退休，一向生活清淡，每日游水，周末行山，閒時耍太極，吃食物少油少鹽，家族冇心臟病遺傳史，膽固醇指標低於三。點知幾個月前某日在屋苑泳池游水之時，忽覺氣管不暢，心口悶住，於是上岸休息片刻，再落池，又見有此現象，不敢再游。次日再游水，又係咁，於是立即返大學睇大學醫生，後搵兩間大學醫學院教授診斷，發覺係血管栓塞，要通波仔及搭橋。Ｋ教授覺得自己咁健康，都有血管栓塞病？心有不忿，以一貫學者風格，猛搵資料研究，卒之喺三月五號入咗伊利沙伯醫院做手術，星期五已見到佢在屋苑散步，現代醫學認真昌明也。
秘書Ｖ嘅哥哥聽到如此故事，上機去公幹之前突覺心胸悶住，驚住自己與教授同一症狀，於是唔敢上機，走咗去睇醫生，醫生要佢入院觀察，次日護士話佢神情有異，立即急call醫生，一小時後就同佢做手術，發覺血管塞了六成，幸好醫治及時啫，假如佢仍然撐住去咗東南亞公幹嘅話，後果難測咯。