天下無不散之筵席，政府噚日宣佈房委會委員王坤任期本月底屆滿後功成身退。王坤加入房委會12年，歷事王䓪鳴、鄭漢鈞、孫明揚及鄭汝樺四個主席，堪稱四朝元老。離任在即，王坤形容近年房委會變成「許願樹」，各界不斷將諸多訴求掛上樹，越掛越多令公屋政策失衡！
既然許願樹冧低，政府又以「貴重地皮應交還」為原則，收回舊屋邨靚地，房委會角色、重要性下降，王坤認為房屋政策架構應簡化，房委會改為諮詢架構，房署就將何文田總部地皮上繳政府。
王坤喺房委會12年，但唔係最老資格，只係平咗蘇慶和紀錄。王坤話多年來只請假一次，因為有個小組會議改期，而佢應承陪太太去中山浸溫泉，「唔去離婚都似」，惟有請假，保唔住100%出席紀錄，算係小小遺憾。
正職係投資顧問嘅王坤，笑言做房委會及公屋聯會主席令佢「搵少好多錢」，八方問佢投資心得，佢話「有閒錢可買股票」，佢係樓市淡友，一直住居屋唔換樓。公屋聯會本月底改選，王坤連任呼聲高，該會幹事、沙田區議員楊倩紅就取代王坤成為房委會新委員，任期下月起至2010年3月。