日漫溝港味　加碼吳氏槍戰

好多動漫迷一定聽過士郎正宗呢個名，經典動畫《攻殼機動隊》及《蘋果核戰記》都出自呢位大師手筆。自2004年推出《蘋果核戰記》電影版，大受好評，四年後從未在港上畫的《蘋果核戰記2：機械人的背叛》推出水貨Blu-ray版同行貨DVD。令人亢奮的是，去咗荷李活做大導演的吳宇森為第二集監製，所以除咗超逼真的3D動畫之外，此集更滲出經典的吳氏風格畫面，如雙槍殺敵、白鴿等。好唔好？見仁見智！

記者：洪偉順

吳宇森監製沾港味

第一集的《蘋果核戰記》是少有用3D加2D畫面製作的動畫片，當中大量的槍戰畫面動作太過直接；嚟到第二集為咗可以令動作畫面更有睇頭，導演荒牧伸志搵咗擅長拍攝槍戰動作片的吳宇森來做監製，係第一次有荷李活大導參與日本動畫製作。吳宇森為戲中的動作場面甚至感情戲都畀咗好多意見，結果當筆者睇到男主角布里艾諾斯攞住雙槍好似發哥上身咁向四周掃射嗰時，加上戰爭前夕一定有好多白鴿飛過，就知道吳氏電影風格已經深植喺《蘋果核戰記2》入面。此外，唔少動作皆以慢鏡表現，空中轉體180°掃射、飛身撲向敵人開槍等，港式味道濃厚，令人睇起上來好有親切感。

a. 吳宇森為《蘋2》作監製。

b. 白鴿出現，又係吳的招牌嘢。

c. 男主角玩雙槍，經典吳宇森電影動作。

3D技術造2D畫面

今集的3D動畫畫質大大提升，單是參與製作的動畫畫家就高達70位，比上集多出一倍人手。而為了唔想做出來的3D效果太假太似膠公仔，所以製作班底運用了一種叫ToonShading的技術，用3D的CG技術轉換成傳統的2D漫畫圖片。不過因為本質仍然是3D的關係，所以做出來的效果完美，光影一致，整體動作更自然外，亦保留了漫畫風格，可以話係新一代的動畫模式。

■女配角雅典娜是其中一位被重新設定的人物。

■男主角布里艾諾斯比起上集更型仔。

■連一隻手錶都做到細紋清楚易見。

■真人穿上感應衫對打，以造出3D真實效果。

80年代建構未來社會

《蘋果核戰記》之所以在美國大紅然後反攻日本，歸功於1985年已推出的漫畫單行本。原著作者士郎正宗在80年代，已建構出故事背景所在的2131年未來世界，而此世界中的人物、武器造型以及世界觀，喺80年代出現都具有劃時代性，即使箇中的一草一木都是由當時的概念發展出來，到現在依然前衞。唔少名詞如「恐怖主義」等，當年已經出現喺《蘋果核戰記》漫畫原著，由此可見作者具備非一般的前瞻性。今集《蘋果核戰記2》的內容圍繞探討複製人、機械人同人類的關係問題，引導觀眾作出思考，難怪當年能俘虜滿腦子「星戰」狂熱的美利堅Fans，成為他們少有熟悉的日漫之一。