今日沙田馬場有大賽，就係二○○八打吡，跑二千米，十四匹四歲馬參賽。打吡乃每季馬場盛事，外國打吡賽只限三歲馬參加，香港馬全部自外國輸入，為遷就馬匹來港適應水土及培育，特別將打吡賽事改為四歲馬賽事，乃適合港情之舉。
個個馬主都有夢想，希望養到一隻打吡馬，甚至打吡冠軍馬，但除咗要有錢買靚馬之外，仲要有運氣先至得，否則何鴻燊咪可以年年贏打吡？賭王今日有隻「爆燈」（十三號）（VivaHongKong）上陣，睇落唔似贏得，屬陪跑份子而已；另一匹十四號「絕塵」，係歷來香港國際馬匹拍賣會之中身價最貴嘅，記得賣價係七百五十萬港元，出自名種丹山，但因評分甚低（八十六分）而要負平磅一百二十六磅，與負磅相同嘅一號馬「綠色駿威」（一百○八分）相比，蝕磅蝕到暈，冇理由揀「絕塵」而放棄「綠色駿威」嘅啫。
睇勻十四隻馬，左丁山大膽地認為三號「喜蓮福星」最有希望，此馬父母血統優良，其父贏過凱旋門大賽，其母贏過二千米，「喜蓮福星」今日跑二千米，路程非常適合，況且曾經於三歲時參加過英國葉森打吡，質素早有保證，應該成為臨場大熱門，為馬主胡家兄弟姊妹（胡寶星爵士子女）揚威。次選會係四號「大腦」，馬主KSLee，據講係化名，甚為神奇；呢隻馬計血統冇長途實力，但在蔡神仙訓練之下，在港戰績驕人，唔敢睇低佢；三選係十號「喜聚寶」，搵蘇銘倫飛番香港策騎，志不在小，再數落去，就係一號「綠色駿威」，二號「永不回望」啦。
馬主Ｋ年年趁打吡請客，今日又有新意思，喺馬場會所六樓包廳，除咗睇跑馬之外，仲加插埋打吡古蹟古物展覽，有關圖片已印製成明信片，送畀賓客；另外搵到一位教授介紹新時代保健系統，用以量度個人之身體，情緒，智力與精神狀況，同場示範表演嘅係電腦化氣功指標。馬主Ｋ搞慣科技，近年專心研究中國古代護理之術（包括氣功）與現代生物科學、電腦科技之結合，但在打吡賽日而兼辦展覽表演，則係奇峯突出，甚有創意。