食物及衞生局局長周一嶽朝令夕改宣佈小學、幼稚園停課，俾家長鬧到飛起，要連續兩次道歉平息民憤，不過京官卻力撐周一嶽，衞生部部長陳竺噚日話，特區政府處理流感「處置得當，反應及時」。
廣州呼吸疾病研究所所長鍾南山日前批評港府宣佈停課，係反應過敏太緊張，陳竺認為停課決定正確，手法恰當，算係幫周一嶽平反。陳竺去年中接替高強任衞生部部長，係第二位非中共黨員做正部級官員，八方聽聞佢同香港醫療衞生官員有交情，原因之一係佢係海歸派，事關香港一班番書仔醫生高官普通話水平好普通，同陳竺用英文吹水暢所欲言，唔似得以前高強在位時，雙方好似雞同鴨講，除咗工作上嘅交流，其他話題冇乜好傾。