工聯會王國興四年前獲捧為勞工界立法會議員，當時工聯會大佬棠哥講明冇得食過翻尋味，四年後想繼續玩就要直選，王國興噚日同八方講，正積極考慮組名單出選新界西。八方聽聞，名單人選可能來自工聯會，亦有可能係新界青年聯會中人，不過王國興噚日好口密不允透露人選，只係話包括年輕專業人士。八方認為乜人都冇所謂，因為都係炮灰。
雖然左派就直選擺位未傾掂數，不過王國興空降新西應該冇甩拖，佢噚日透露自己係正宗楊家太極傳人、姚光師傅八名獨門徒弟之一，為顯示有真功夫，即場示範紮馬，叫八方試吓推佢，八方係門外漢，梗係推佢唔郁。王國興紋風不動，唔知係咪想以身體語言下戰書，叫其他兄弟唔好打佢主意，佢出硬新西，其他人唔使旨意叫佢走。
至於盛傳會遭民建聯叮走嘅蔡菜子，雖然冇跟名師學太極，不過下盤功夫都十分穩陣，噚日接受訪問時話，唔排除會同黨友分開名單出選港島，即係話就算民建聯名單可以叮走佢個名，都叮唔走佢個人。蔡菜子之前嘅參選拍檔係程介南同馬力，今次倒不如單拖出馬，輸贏自己嘅事，有實力唔怕輸，落選亦唔使怨人。