白鴿黨成日呻窮，噚日開始本年度大型籌款活動，黨內大佬要企街賣獎券。去年街頭賣獎券籌到110萬元，今年經濟前景麻麻，佢哋唔奢望有突破，目標係八個星期內籌到110萬元，今年獎品幾豐富，頭、二、三獎分別係手提電腦、手機同數碼相機。
為咗呼籲市民捐錢，白鴿黨不惜自揭底牌，披露黨內財政狀況，每年支出達1,480萬元，收入大約880萬元，當中六成半收入來自會員上繳同捐款。根據呢盤數，白鴿黨今年就有赤字600萬元，所以要落力籌錢填氹。白鴿黨仲會推動每月捐款計劃、售賣紀念品等方式籌募經費，否則隨時財政枯竭。
為保證籌款數字，八方聽聞黨員要包銷一定數量獎券，地區發展者、候選人「種籽」每人100張，區議員150張，立法會議員更多，好彩賣唔晒可以退回黨總部，唔使自己啃。