一講到濃情朱古力，女士通常都會露出又愛又恨嘅表情，好想即刻狠狠咬一大啖，但又好驚成個月辛苦減咗嗰幾磅泡湯，當正朱古力係食物中嘅恐怖分子，完全唔掂得。其實好多人都高估咗朱古力嘅熱量，一小塊40克嘅朱古力，大約等於一小碗飯或麵嘅卡路里，只係淺嚐一塊應該問題唔大。
有助減患心臟病
朱古力營養豐富，比食薯條、薯片及餅亁等零食更有益，一小塊牛奶朱古力含有大約三克蛋白質，加埋鋅、鉀、鎂同維他命B，食朱古力嘅好處其實同飲牛奶差唔多，當然食乜嘢都唔可以過量，每次食少少，朱古力都可以係健康食品。
瘦身同朱古力唔一定係勢不兩立，好多研究都發現過重嘅人，其實都唔係食得太多甜嘢，而係熱量入多過出，即係每日攝入嘅熱量，超出咗身體活動嘅能量支出，所以與其唔敢食朱古力，倒不如做多啲運動，就食多幾塊朱古力都唔怕啦。
順帶一提，食朱古力可減低患心臟病嘅機會，因為可可粉含有大量多酚類物質，屬強力抗氧化物，可以防止血管閉塞，同綠茶、蔬菜、生果一樣對健康咁有益，朱古力果然係一種有「營」零食。
blog主：醫神