賭王何鴻燊愛女何超儀和陳子聰結婚四年，二人一直未有生育大計，超儀前晚在《蘋果》網站直播節目《娛樂開CHAT》接受主持王友良的大逼供，她說：「我唔鍾意BB，我鍾意狗仔，BB好大責任，唔可以亂生。」
兩夫妻也會有拗撬，超儀說：「佢係奀皮。」她表示陳子聰有時會找話題一齊討論，當嗌出個火頭會點收科？超儀說：「佢會自動行開一邊。」當火頭熄滅，夫婦又恩愛如昔。大家可登入《蘋果》網站 http://ent.appledaily.com隨時重溫節目。
採訪：比華利、懷鈺 攝影：葉君海
四月出新碟型爆 Summer銅鑼灣
Summer：Hello，你好呀何超。我喺銅鑼灣TimesSquare見到你隻MV，好正喎，你隻碟幾時出呀？
何超：我隻碟四月就會出㗎喇！
Summer：仲會唔會有其他MV㗎？你呢個MV拍得好型呀！
何超：有呀，仲會有多條MV叫《償還》嘅。
Summer：咁呢首《償還》幾時會有得睇呀？
何超：暫時未有呀，會遲少少，因為𠵱家仲播緊《何超市》呢首MV。
Summer：你要繼續努力呀！我會支持你呀！
何超：我會繼續努力喇！多謝！
最愛豪情趙啷啷 Noho打鼓嶺
Noho：你較為喜歡演邊一類型嘅角色呢？
何超：我較為喜歡演一啲比較激烈啲嘅角色嘅，或者係飾演一啲強硬啲嘅女人，或者係一啲劇本中間有一啲Twist嘅，你估唔到結局係點嘅，或者係好誇張嘅角色，可能會令到觀眾有啲不安㗎，我演呢啲角色都唔介意、都鍾意嘅！
Noho：咁多個角色我最鍾意睇「趙啷啷」（編按：電影《豪情》中何超儀的角色）囉！
何超：哦，你都係鍾意睇「趙啷啷」呀？
Noho：係呀，嗰套戲你去得好盡呀。
何超：其實嗰套戲我開頭唔喺好抱住做嘢嘅心態，我喺諗住玩吓㗎，係諗住同陳奕迅去jam吓，點知我收到個劇本之後，越整越鍾意，越整越投入囉！同埋學識咗樣嘢嘅，學識咗放鬆，唔好成日諗住今日要做得好好，今日做得唔好，就會令到效果失場呀，用一個輕鬆嘅心情去演戲，效果出嚟好好多。
投訴新歌冇得唱 Christy灣仔
Christy：我好鍾意你《地獄廚房》呢首歌㗎，點解卡啦OK冇得唱呢？
何超：《地獄廚房》喎？
Christy：冇呀！另外嗰啲就有，係冇《地獄廚房》呀？
何超：咁慘？！
Christy：係啦，可唔可以有得唱呀？想唱都冇得唱！
何超：多謝你提供資料俾我，如果係咁，就係該發行公司有啲嘢冇做到囉。
Christy：𠵱！我會唔會講錯嘢呀？
何超：唔會囉！多謝你先真，你喺呢度講，希望該公司聽到啦！
醫療小八卦：健身操練減腰痛
何超儀表示早前不慎弄傷腰骨，所以很容易舊患復發，看過不少醫生都未能根治，她說：「我曾飛過美國三藩巿睇醫生，可惜都幫唔到我，最後我惟有去睇物理治療，結果就學咗幾招健身操。」
超儀更親身示範健身操，她先俯伏在地上，全身放鬆，雙腳分開，利用雙手支撐上身，她邊說邊做：「好似做掌上壓一樣，盡量將啲力集中晒喺隻臂，千祈腰部要放鬆。」超儀建議大家每次做這個動作十次為之一個環節，一日最好可以做到三個環節，她說：「我習慣臨瞓前做，持之以恒，腰部嘅痠痛會得到改善。」
