對好多電腦用家來講，Apple推出MacBookAir實在係大誘惑，除咗拎出街成為潮人標誌外，機身輕便為用家減輕唔少負擔。不過，中毒太深嘅PC人要轉用Mac始終有難度，加埋Air過份簡約嘅設計，確實令人卻步！𠵱家Lenovo新機X300機身可同Air一較高下，你又點睇？
記者：許福合
攝影：陳陶鈞
鬥外表：Air險勝
Air推出之時，最搶鏡當然係又薄又輕的機身，所以SteveJobs就用由公文袋收藏Air來Sell新機，效果極之唔錯！至於LenovoX300又如何呢？筆者專程去文具店用$2買咗個極普通的A4公文袋，X300一樣可以放得落，證明同樣係13.3吋NB，要放入公文袋都唔係Air嘅專利！要將NB擺入袋，首要條件當然要夠薄，Air厚度由4-19.4mm，而X300為18.6-23.4mm，可以見到Air厚度上略為佔優；而重量方面Air為1.36kg，X300為1.42kg，拎上手差別相當少。雖然X300機身夠輕巧，不過見到X300不能不說一句「又係咁款！」自IBM時代以來似乎無甚變化，雖然用上方程式賽車物料製造的機身比較耐用，但要同Air外觀上爭客，看來有難度。
鬥功能：X300贏
Air賣點可以話係全部外置，最爭議當然係無光碟機，就連USB頭都只得一個！X300這方面就屬一部功能完整電腦，從外觀已可見到有齊三組USB介面、VGA輸出，接駁方面比較有彈性，而內置GBEthernet亦可讓用家經Cable連接上網，再加埋內置DVD+/-RW，無論係經光碟安裝軟件又或備份資料都方便。有留意Air規格，會見到硬碟方面可選用SSD；而X300就更進一步，本身使用64GBSSD硬碟，令移動中亦可有效保護到硬碟內的資料。另外，X300亦比較注意資料保障，內置有指模辨識，確保只有授權人方能操作，更適合商用型用家。
鬥長氣：打和
Air使用時間特長達5小時，Apple更講到明係開住無線網絡來計算；而X300官方資料係10小時電池壽命，實際操作時間約4.3小時，相比下Air電池耐用比較佔優。不過Air電池不能更換又令其失分；X300採用3Cell可更換電池，若有需要更可以移除光碟機，加裝額外電池。
鬥價錢：Air勝
Air開價$14,990，而X300更為驚人，以$23,888發售。雖然X300功能更為全面，不過定價略嫌太高，相比之下Air售價比較令人容易接受。
查詢：Lenovo（800938838）