特區政府為咗向阿爺交功課，噚日向立法會議員講解未來推動國民教育工作重點，愛國教育呢家嘢左派自認專家，佢哋噚日熱烈獻計，甚至擱下敵我矛盾鬥爭，唔再反對引入外國勢力，公然提議愛國教育師承美帝，唔理西人、華人，總之愛國就係好人。
批評學校唔升國旗
民建聯黃定光指港英時代好多官校日日扯英國旗，回歸後卻唔多見學校扯五星紅旗，市民對《義勇軍進行曲》唔熟悉又唔尊重，睇見就火滾。佢黨友蔡菜子聽後有感而發，指美國人一般好尊敬國歌、國旗，香港人就冇呢份愛國情操嘞。蔡菜子建議港府向美國偷師，日後要加強力度宣傳愛國教育。
左派平日鬧民主派勾結外國勢力，堅決反對外國干預香港事務，估唔到喺愛國教育呢件大是大非事情上，佢哋胸襟咁廣闊，真係令人刮目相看。至於係咪有人暗插根正苗紅嘅德成局長辦事不力，背後係咪牽涉權力鬥爭，八方一概唔揣測，只係本住一片丹心，提出搞好愛國教育建議畀各方端詳。
美國係先進發達國家，土共老左高呼效法花旗國果然識貨，所以八方建議禮聘美國重量級人馬嚟香港做愛國教育導師。好多議員批評港府國民教育報喜不報憂，只教改革開放經濟成就，隻字不提文革浩劫、六四屠城，如果要改革課程，最好搵唔信共產主義嘅山姆大叔（UncleSam）任教，佢一定可以令香港人對中共歷史黑暗一面睇真啲。
左派認為愛國感情同扯國旗次數成正比，扯國旗係體力活動，搵喺美國公認臂力驚人嘅洛奇做教練啱晒，話晒佢最鍾意着條美國旗Boxer上擂台，等香港學生見識到原來國旗可以咁型in潮，實會爭住扯國旗。唱國歌方面，民主黨張文光批評克勤、Gigi、Kelly合唱首《熱愛基本法》一味硬銷搵鬼聽，建議抽起停播，八方好贊成，不如搵米高積遜嚟指導港人唱歌技巧，《義勇軍進行曲》配上Moonwalk舞步，預祝中國太空人登月成功。
《基本法》日唱夜唱略嫌兒戲，要香港人正正經經認識《基本法》，最好搵美國隊長（CaptainAmerica）身教，佢係正義化身，奉公守法又愛國，做香港人嘅愛國精神偶像，相信左派都冇異議。
mailto:[email protected]