花旗股市前晚下跌兩百幾點之後反覆回升，但並冇見底迹象，市場氣氛甚差，𠵱家最熱門嘅話題已經唔係聯儲局下禮拜會減幾多息，而係「美元嘅信心危機」。
「信心危機」呢樣嘢唔講得笑，因為冇公式可以計，搵專家都問唔到，睇吓美元俾人插得幾犀利就知，最弊就係聯儲局嘅底牌俾人睇晒，「減息救經濟」獨沽一味，睇死美元要跌，炒家仲唔肆無忌憚咩！咁都冇計，聯儲局唔可以玩挾倉，出口術都冇用，因為一定要減息，況且家陣美元唔單止俾炒家插，全球央行嘅態度都好重要，因為大家都揸咗好多美元做儲備，如果一齊沽，點算？花旗啲盟友可能唔會沽得咁明目張膽，但係偷偷地沽可能無可避免，至於石油輸出國嘅態度係點，就好難講嘞，因為佢哋對美元大跌已經好唔滿意，總之大家呢排睇個市，千祈唔好漏咗睇美元呢瓣。
又到周末，港股呢兩個禮拜跌得好傷，唔多唔少同內地股市下跌有啲關係，大家驚乜嘢？梗係加息啦，睇成個局，呢兩日宣佈加息嘅機會好大，除咗咁，好可能仲有一啲遏抑樓市嘅手段，內房股雖然已經跌咗好多，千祈唔好貪平咁快撈貨。
資金追捧公用股
港燈C輪7769：港股偏淡氣氛濃厚，資金追捧公用股，昨日港燈（006）幾省鏡，呢幾日成交咁大，買貨嘅應該係換馬嘅基金為主，應該未升完，再炒可以睇55元，買少少C輪7769，昨收78仙，有效槓桿率4.1倍，正股升上55元，7769應該喺1.18元樓上，正股跌穿46元止蝕。