香港再次面臨流感侵襲，近日已先後有三位分別兩歲、3歲和7歲的兒童疑因流感併發症死亡，港府前日早上仍堅稱全港學校毋須停課，未料相隔12小時後竟忽然推翻，食物及衞生局局長周一嶽前晚10時突然宣佈全港小學、幼稚園及幼兒中心等全面停學兩星期，制度朝令夕改，令家長及學生陣腳大亂。
不少星爸媽及子女也因此事大受影響，黎耀祥的10歲兒子黎正橋現就讀小學四年班，為人父親的祥仔昨日怒轟港府冇腦，為驚孭鑊議而不決；呂良偉昨日則帶着6歲囝囝離港避難，往廣西探訪雪災災民；徐濠縈和甄子丹太太汪詩詩更一早自行安排子女停學，以策萬全。 採訪：李全
嫌醫療未跟上
星爸爸：呂良偉
兒子：呂善揚（6歲小學一年級）
呂良偉：我今日帶個仔去廣西探訪雪災災民，一早請咗假，加埋復活節假，佢唔使返學兩星期，好開心好似大解放咁，不過我哋帶埋功課去做㗎，咁蹺又話停課，我覺得停課嘅安排OK，始終流感演變得太快，醫療方面都未跟得上轉變，我會密切留意事態發展。其實我之前都幾擔心，凡有小朋友嘅家長都會擔心啦，惟有睇實啲。
搶先自行停課
星爸媽：陳奕迅、徐濠縈
女兒：陳康堤（3歲K1幼兒班）
徐濠縈：我𠵱家喺日本，但噚日已經收到老師同工人電話，已經知道停課啦，不過我個女其實由星期一已經停課，因為囡囡星期一開始流鼻水，所以我冇畀佢返學，𠵱家佢讀K1，返學都係唱遊啫，上少兩堂都唔怕，所以如果學校有同學仔感冒，我一樣唔會畀個女返學。
鬧個個驚孭鑊
星爸爸：黎耀祥
兒子：黎正橋（10歲小學四年班）
黎耀祥：噚晚係姨仔10點幾打電話嚟話停課，我哋先知道消息。停課係冇問題，但唔係個個家長都成日扭開電視、聽收音機。政府好鬼戇居，都要有個途徑安排，應該通知各大學校，再由老師知會家長，雖然好似費時失事，但都要做㗎。香港政府成日俾人話，係因為議而不決、決而不做，大家你推我讓，開會幾個鐘，做到決定就快少少啦！政府冇腦嘅，香港嘅民生決定喺呢班儍佬身上，不知所謂，個個都驚死孭鑊，我個仔就不嬲大大隻隻，叫係活躍，流感都冇得驚，唔通唔出街咩，搞好啲抵抗力，自己執生啦。
停課可斷病源
星爸媽：鍾鎮濤、范姜
女兒：鍾嘉晴（12歲小學六年級）、鍾懿（3歲K1幼兒班）
范姜：咁多學生病咗，我哋都好擔心小朋友返學會被傳染，所以停課安排係必須。停課先可以斷咗病源，減低病菌擴散機會。至於安排方面，我睇電視都知道停課，學校老師噚晚都有用電話通知我哋，最新消息同呢幾日嘅功課都可以上學校網站搵到，我覺得安排冇問題。其實作為家長都應該自己去關心多啲事情發展，而唔係單單坐喺度等人通知。
責忘沙士教訓
星爸媽：任達華、琦琦
女兒：任晴佳（3歲，K1幼兒班）
琦琦：我覺得政府嘅處理方法唔係幾好，太夜先通知家長，又唔夠積極，都冇吸取到先前沙士嘅教訓，早前已經有3個小朋友死咗。不過囡囡學校嘅處理方法就好好，一早打電話通知家長停學，而且學校一早有幫小朋友量度體溫，相反學校嘅準備工夫就做得好足。
籲增家長指引
星媽媽：羅霖
兒子：劉子榕（11歲半小學六年班）、
劉子晉（9歲小學四年班）、劉子熙（兩歲學前班）
羅霖：今次政府反應唔夠快，臨急臨忙好夜先通知家長，我認為政府應該畀多啲指引家長，早啲畀家長知道今次流感嘅嚴重性，我知道有啲家長冇睇電視唔知道停課安排，好彩家長有互相通知大家，三個仔突然間放假，我就會好忙，不過就唔會帶佢哋周圍去，我會安排佢哋做多啲運動，增強抵抗力。
或返加國居住
星爸媽：甄子丹、汪詩詩
女兒：甄卓宜（3歲，K1幼兒班）
汪詩詩：其實我幾日前已經冇畀個女返學，我覺得政府反應比較慢，而且宣佈得比較突然。為咗預防流感，屋企人已經做足防禦措施，例如戴口罩同消毒用品等，又買咗空氣清新機，呢兩日會帶個女去打流感針，如果流感再嚴重落去，唔排除會帶仔女返加拿大住。
不滿朝令夕改
星爸媽：王敏德、馬詩慧
兒子：王躍穎（8歲小學二年班）
馬詩慧：就算政府唔公佈全港停課，我都唔會畀個仔返學，好多細路仔病。其實朝早又話唔停，夜晚又話停，有啲家長兩個父母都要返工，夜麻麻點處理啫？我哋都買晒口罩、洗手液，盡量減少出席公眾地方，暫時冇打流感針，反而會叫佢做多啲運動，等佢身體強壯啲。
夜突襲惹恐慌
星爸爸：張堅庭
子女：張一諾（10歲小學四年班）、
張高翔（7歲小學二年班）
張堅庭：噚晚我雖然喺北京，但已經收到家人電話通知停課嘅決定，但我好唔明點解要拖到咁夜先去講，咁做好錯，因為咁夜先去公佈，好容易引起恐慌，市民會以為事態好嚴重，為乜嘢事唔可以喺辦公時間公佈呢？
