恒生銀行慶祝成立七十五周年紀念，三月十日於會展中心新翼五樓大堂舉行隆重酒會，整個大堂佈置得有尊嚴有氣勢，台上有隊十幾人嘅管弦樂隊演奏，左丁山唔識宴會製作，但在大堂內碰到專家B姐，B姐話粗略估計，如此裝置兼佈景，製作費起碼幾十萬，若係七位數字，佢都唔驚奇。
恒生廣邀香港各界人士參加酒會，當然人人畀面，酒會四時開始，未到五時，會展外交通已塞得水洩不通，平治、寶馬、凌志各款汽車絡繹於途，加上的士爭路，大家行不得也哥哥。你估講笑咩，三千幾名政商界要人到場祝賀，包括主禮嘉賓曾特首與唐司長、曾司長，會展附近怎會不打晒困龍。
恒生銀行高層在柯總裁率領下，空羣而出，所有客戶經理站在入口兩旁人釘人，一見到自己客戶嘅，立即趨前笑面相迎，元老利國偉爵士坐在輪椅，太太陪同下，由護士推入場，現任恒生董事長錢果豐與柯總裁在旁護駕，恒生銀行之有今日，前輩居功至偉，仍然在世之前輩中，利爵士最是地位尊崇，雖垂垂老矣，有病在身，後輩那敢不尊而重之。
之後見到滙豐大班鄭海泉、王冬勝等滙豐高層及各大銀行代表蒞臨，何添夫人與朋友及子女隨後而至，何夫人笑容可掬，精神飽滿，真有福之人也。
左丁山握手握到手軟之際，電話響起，來電老友告知，馬會董事艾爾敦退任，董事局即時選拔I.Bruce（布魯士）接替，由施文信接替馬會副主席一職，消息來得突然，一時難以消化。來電人士話艾爾敦之做馬會董事，乃因為佢當年係滙豐亞太區大班，而馬會董事局內傳統上一定有滙豐大班在內，𠵱家艾爾敦唔做，按傳統應由鄭海泉頂上，點解會由「喜勇駿」、「超勇駿」馬主布魯士接艾爾敦呢？布魯士今年六十七歲，一九八一年四十歲就當選為遴選會員，資歷甚厚，當然有資格做馬會董事。來電者猜測，唔知係唔係鄭大班過於繁忙，穿梭倫敦香港及亞太地區之間，可能冇時間做馬會董事呢。如此猜測有冇道理，遲啲再講啦。