自從新地（016）主席郭炳湘宣佈休假之後，唔少世叔伯都評論過呢件事，啱啱星期一，賭王何鴻燊喺恒生75周年慶祝酒會度，就叫佢哋要「三位一體」。賭王言論星期二見報，郭氏三兄弟即刻做嘢，回應吓呢位世叔伯，果然聽教聽話。
根據港交所（388）嘅資料，郭氏三兄弟星期二（11號），以平均每股116.87蚊，增持咗29.5萬股新地，雖然對於三兄弟嚟講，銀碼唔算大，只係3447.67萬銀，但三兄弟一齊增持，算係「三位一體」。嗰日新地股價同個巿一樣先跌後回升，最低見過116.3蚊，後尾收市升返去119.8蚊。
阿媽 叔伯 唔使愁
新地呢個月6號公佈業績，過咗業績公佈前一個月禁止買賣股份嘅期限，雖然三兄弟嗰日都缺席新地業績記招，但似乎以行動證明佢哋三兄弟全無芥蒂。
郭炳湘上個月18號宣佈休假後，翌日收市140蚊開始計，直至3月10日收市122蚊，累計跌咗18蚊或13%，透過增持支持股價都好應該，之不過，三兄弟聯手，應該係透過家族基金進行，咁你估係邊個提出嘅意見呢？
電郵：mailto:[email protected]