流感肆虐，學校停課，全城進入「沙士」式戒備狀態，雖然消毒藥水、口罩搶購一空，不過沙士時期人人戴口罩嘅情景尚未出現。八方噚日同中大醫學院院長霍泰輝食飯，霍院長話早兩日唔舒服，要喺屋企唞唞，打電話返學校通知同事會議押後一小時開始。
點知返到學校，一打開會議室道門，發現在場10個教授通通戴上口罩，包括沙士英雄、逸夫書院院長沈祖堯教授。霍泰輝話當場呆咗，暗忖使唔使咁大陣仗啊，之後同大家講，「我腸胃炎咋喎，戴口罩都冇用㗎噃。」成班教授級大醫生聽完放下心頭大石，齊齊除口罩。
沙士初期，中大醫科生係首批中招病人，威院又係首間「遇襲」醫院，難怪中大醫生警覺性咁高，佢哋對流感潮唔掉以輕心，都未嘗唔係好事。