有好多人話香港嘅富豪第二代未成氣候，但華華就唔多覺，好似女賭王何超瓊、富豪酒店（078）太子女羅寶文都非常幫到屋企手，而鄭裕彤孫仔、新世界百貨（825）執行董事鄭志剛（Adrian）噚日見傳媒，表現亦比之前進步好多。
噚日係Adrian第二次出席公司嘅業績大會，負責向傳媒present業績報告。雖然公關大員幫手寫咗篇講稿，但Adrian整體表現比上次放鬆咗好多，亦不時望吓啲攝記，等啲攝記可以同佢影番幾張自然啲嘅靚仔相。講完業績行返埋位嗰陣，佢可能好滿意自己嘅表現，所以忍唔住笑咗出嚟。
不過，可能佢仲係唔太習慣面對傳媒，所以一到答問環節就顯得比較緊張，仲好唔小心聽錯記者行家嘅問題！
點都好，華華覺得Adrian已經比起招股嗰陣進步咗好多，睇佢噚日只係飲大會安排嘅法國老字號Evian樽裝水，冇特登買支貴水，就知佢識得應使得使，大個仔喇！