再有對冲基金爆煲消息傳出，導致噚日亞洲股市下挫，港股亦遇沽壓大跌1121點，以接近全日低位收市。散戶心慌慌，連嘉賓同主持都唉聲嘆氣，認同後市勢危。
郭：郭家耀 玲：楊慧玲
玲：見到咁嘅情況，我同大家一樣都冇晒心機，究竟可唔可以守住22000點先？
郭：個市大跌好明顯受到隻對冲基金爆煲影響，導致出現斬倉潮，拖累環球股市出現大調整。整體氣氛唔好，睇嚟短期有機會下試21700點水平㖭。
玲：聯儲局話出新招救市，有人質疑會唔會係低處未算低，將所謂好消息當埋壞消息炒喎！
郭：係呀，投資者𠵱家都會用短炒策略，賺到就即走。近日股市經常單日內轉向，但升勢始終唔可以持續。
玲：公用股喺波動市中係咪可以發揮避難所角色？
郭：公用股好似係大市指標，中電（002）喺唔穩定嘅市況下都有得升，算唔錯，不過我覺得REITs都有類似功用。
玲：咁嘅市況好似冇乜穩陣股，有投資者話不如唔玩股住，存人民幣算喇，你點睇？
郭：其實揀基本因素好嘅股票都唔怕，國企股淨係計盈利增長同人民幣升值因素，一年都有四成增長喎。雖然個市調整唔少，不過散戶唔需要太恐慌，始終買股都係要睇公司嘅基本因素。投資者最緊要睇番本身投資組合嘅防守力同現金水平作出部署。
亂市低撈中石油
關公：個市咁亂最啱執平貨，中石油（857）10.2蚊樓下抵買啦！短炒走轉可以賺餐茶。
郭：雖然中石油受大市拖累，但喺10蚊左右有唔錯支持，短炒無妨。不過要小心個市出現斬倉潮，最緊要執行止蝕策略。
關：如果佢跌穿10蚊我會再加注㖭！我覺得佢唔會再點跌。
郭：我相信佢業績會平穩增長，但唔好預期會有好大升幅，因為舊年產量平穩，實現油價升幅唔會跟足國際油價升，下游業務相信都係處於虧損。佢𠵱家估值12倍，已經調整咗好多，加上3厘股息都算合理。中長線投資風險唔大，不過短線都會受市況表現影響。
玲：中海油（883）個價都平，關公點解你唔揀？
關：中石油跌得多啲，抵買啲！
《大埔關公個案》
買入價：10.2元
目標價：11.5元
止蝕價：9.5元
時期：一星期
唔怕跌睇好中移動
黃小姐：我睇好中移動（941），喺106.6蚊入咗，想問呢個位入穩唔穩陣？
玲：奧運就到，加埋啲人翻炒3G同重組概念，究竟仲有冇用呢？
郭：中移動之前都上過110蚊樓上，我都好鍾意呢隻股，市盈率30幾倍係高咗啲，不過以佢嘅增長應該支持到個PE。佢有機會返A股上市，應該係以母公司舊股為主，咁就唔怕有攤薄效應。106蚊呢個位入都算唔錯。
黃：我唔夠膽入咁多，如果再跌好唔好再入啲？
郭：100蚊邊分注入係合適嘅長線投資策略，睇公司基本因素同人民幣升值，佢係唔錯選擇。
《九龍塘黃小姐個案》
買入價：106.6元
目標價：116元
止蝕價：-
時期：三個月
後市危買泓富避難
David：𠵱家個市唔穩定，我會揀啲防守性高啲嘅股票，其實我幾鍾意中電（002）同泓富產業（808），不過泓富產業股息高啲，你哋點睇？
玲：呢隻股近期橫行，就算大市跌都冇乜點受影響，今日仲逆市升喎，係咪有避風港效應？
郭：係，泓富現水位下跌空間唔多，買佢嚟收息我唔反對，不過我個人比較喜歡冠君產業（2778），佢旗下花旗銀行廣場會陸續續租，租金大約每呎110蚊，加上購入埋朗豪坊，佢嘅防守性幾高。
玲：David你應該係睇長線，但泓富多工業大廈，增長可能遜色啲。
David：錢放係銀行冇息收，我買佢起碼收多啲息先吖！
《西環David建議》
建議買入價：1.62元
目標價：-
止蝕價：1.55元
時期：長期