馬會董事陳南祿第一次養馬，買入一隻自購新馬，取名「有機可乘」，英文名字用拉丁文，叫做CarpeDiem，點知隻馬傷患纏身，操咗成年都唔能夠上陣，飛機陳心知不妙，立即買入另外一隻紐西蘭新馬，取名為「時時有機」，英文名叫做SeizetheDay，飛機陳雖然已離開國泰，但念念不忘國泰，連件騎師綵衣都用紅色配白綠袖，我哋一睇，就聯想起國泰航空。
呢隻馬只有兩歲，○七年十一月二十三日開始踱步，操足四個月，仲係好似肥豬仔咁款，三月九日今季第一場新馬賽事，飛機陳身為董事，派隻馬上陣捧場，碰啱佢是日做監場董事，本人不可下注，聽講佢太太身在德國，特登問吓使唔使趕返香港督師，飛機陳話隻馬唔似有機會，問過幾位評馬人，評馬人一致看淡，話畀飛機陳聽：「等下季啦！」再問練馬師徐雨石，練馬師話爭取經驗啫，邊度夠跑呀！於是飛機陳周圍叫啲朋友慳番，唔好嘥錢，陳太聽到咁嘅評論，知道國泰雖然時時有機啫，亦無謂特登趕住返香港吖。
好嘞，正式開跑前，左丁山睇過各報名家貼士，馬房貼士，第一場七隻馬之中，一、二、三、四、五、七號都有人貼，獨是六號「時時有機」冇人提，臨場最後賠率六十七倍，大熱門三號「數糊第一」落飛如狂，只得兩倍，一號「陸豐福星」有人落注幾十萬，將賠率由九點七倍打到落四點九倍。左丁山諗住與飛機陳一場老友，係咁意捧場，買連贏位置Ｑ全餐，單Ｔ全餐，每注十元，以為輸梗。哈，世事真奇妙，大冷門「時時有機」居然跑第一，大熱門「數糊第一」跑第尾，有人對佢信心爆棚嘅「陸豐福星」跑第六，益咗左丁山收番接近三千蚊，笑到㗎㗎聲，但好多老友即刻怨聲載道，話飛機陳睇錯馬，唔益老友！但係馬主Ｎ就笑得仲犀利，因為佢飛起三大熱門，下注六號「時時有機」獨贏位置各五千元，收番三十八萬幾，當堂震驚馬場七樓。馬主Ｎ話佢素來討厭大熱門，鍾意吼冷，今次一棍扑中。事後問另一位馬主Ｎ（事先話陳南祿隻馬唔使睇）有何評論，呢位馬主話：「『時時有機』跑出時間係59秒，以往嘅第六班時間，差到極，再出仍然唔使睇！」