之前為勞動法而大動肝火嘅玖龍紙業（2689）董事長張茵，每次提到勞動法都無明火起，華華仲記得舊年12月，佢喺香港一個研討會上，向負責勞動法嘅官員開火。點知噚日張大姐接受《南方日報》嘅專訪時，竟然決定封嘴，唔再講勞動法！
妙喻不能跟父母鬥
對於外界嘅輿論，張茵話佢只係感到「坦蕩蕩，很平靜」。其實張茵本身都係政協委員，佢話以企業同政協呢個身份去睇，勞動法係有利國家，但作為商家，「我代表我所在的階層，說出所看到的。」佢話抱怨勞動法嘅商家唔止佢一個，只係咁啱次次啲記者都走去問佢，佢先會成為大家嘅輿論中心啫！
至於點解決定鳴金收兵呢？張茵就話：「這就像我們跟父母的相處一樣，我們永遠不能跟父母鬥，這塊土地是養育你的，父母的原則訂了，但是你可以提建議。至於提完建議後怎麼樣，這由父母決定。」咦，呢一個比喻都幾妙喎！
咁就冇錯嘞，話晒父母主宰一切，冇佢又點會有你呢！相嗌唔好口，和氣先可以生財！起碼張茵唔再發火鬧勞動法，啲大戶先敢增持玖紙股份，股價先會升㗎嘛！