鄧麗欣（Stephy）與傅穎（Theresa）在公司爭上位，結果鬧不和，但前晚Stephy主演的新戲《我的最愛》首映，Theresa卻前來捧場，不過Stephy強調不是自己請她來，而事實上兩人在首映中甚少交談，看來她倆不和已做到很出面。
鄧麗欣、方力申、唐寧、楊愛瑾（Miki）和曾愷玹主演、葉念琛執導的《我的最愛》前晚在奧海城舉行首映，出席者除了有該片的幕前幕後人員外，還有投資公司金牌老闆黃柏高、Stephy的前Cookies隊友傅穎、蘇永康、TVB藝人鍾嘉欣與王祖藍等前來撐場。
再次否認喪蒲
記者問Stephy是否她請Theresa來撐場？她說：「唔係我請嚟嘅，我諗係公司安排，我同佢都冇嘢。」對於有周刊報道她放蕩，她無奈說：「我同排舞老師Sunny影嘅相好普通，我唔明點解會寫成咁，我同Sunny只係朋友關係，自己都唔係愛喪蒲嘅人，但有人要刻意中傷同針對，我都冇辦法，不過以後講嘢會更加小心，免得又俾人捉住嚟借題發揮。」
Stephy的緋聞男友方力申則力撐她說：「我所認識嘅Stephy唔係一個愛蒲嘅女仔，佢俾人咁寫法，我都好同情佢。」前晚小方請了父母和好友來捧場，記者問他在戲中有大膽接吻戲，不怕父母看後會尷尬嗎？他說：「唔怕，又唔係第一次，可以拍得激一啲，其實性感冇問題，但露股就唔好，我覺得自己個股仲未夠資格拍呢啲鏡頭。」
Miki大露背
此外，大露背的Miki前晚甚搶鏡，但她不時雙手按着裙兩側，似乎很擔心走光，事後她笑言：「着到咁性感，真係怕走光，雖然已經貼晒膠紙，但都係心驚驚。」
戲中Miki與胡清藍有戀情，而現實中兩人感情也不錯，日前兩人更一起去逛街，當記者問他們是否拍拖？胡開玩笑說：「靚女係人都鍾意，如果要佢肯，我諗要買個engine（指車）先得啦！」Miki則否認說：「我同佢唔係拍拖，係佢話鍾意我都係講笑啫！」
採訪：魯萍
攝影：陳俊強