拖完又拖嘅醫療融資諮詢文件噚日終於出爐，呢份文件全長百幾頁，成本書咁厚，一般正常人應該唔會有興趣拎起嚟睇，八方為讀者服務，將份文件由頭睇到尾，幫大家製作「雞精版」天書，以便大家了解內容。睇完發覺唔使多此一舉，事關政府用心良苦，知市民怕睇文字數據，喺封面已顯示重點，一睇就明，就係向市民攤大手板，畀錢啦！
諮詢文件有六個方案，千言萬語卻萬變不離其宗，就係要大家畀錢供強醫金，六個方案中有五個係花拳繡腿虛招，最攞命一招係方案六「個人康保儲蓄」。呢招「醫療融資神掌」，中者初則感到膊頭負擔加重，兩肩漸感痠軟乏力，要節衣縮食紓緩病情；長期則令荷包內傷，中醫講法係躁底亁塘，西醫認為係缺乏維他命M，最慘係唔斷尾，醫療融資都救你唔到，只能靠努力搵多啲錢死供強醫金吊命。
封面封底露玄機
可能怕大家點極唔明，諮詢文件封底都有玄機，有隻BB仔手，呢隻手唔係攤大手板叫你畀錢，而係伸出嚟要攞錢咁款，大手要你畀，小手問你攞，左右開弓雙重夾擊，香港人今次點都走唔甩㗎嘞。
有立法會議員批評政府好市儈，指成份文件九成內容講收錢，改革醫療制度只係輕輕帶過，如何照顧弱勢社群更係冇乜着墨，總之就講金唔講心。諮詢文件有個「壯」字logo，有人指好似兩個人打交，右邊個人一招摧心掌直擊要害，打工仔梗係捱打嗰個啦，第日money同salary要葬送強醫金，呢個「壯」字，應該係悲壯咁解。
煲呔政府推銷強醫金許勝不許敗，所以要計準時機、睇準時勢先出台，不過八方發現佢哋算有遺策，竟然唔記得睇掌！特區政府風水治港係公開秘密，搵高人指點過先推出諮詢文件都唔出奇，但弊在封面隻「神掌」累事。
掌相名家吳佩孚同八方講，呢隻掌係斷掌，感情、頭腦線黐埋一齊，不利理智思考，可能影響市民理性討論文件；生命線則短而唔清晰，紋末散而乏力，雖然長命，不過多病，八方聽完嚇一跳，照咁睇份文件咪凶多吉少？如果今次諮詢因為隻斷掌衰收尾，唔知搵邊個孭鑊。
mailto:[email protected]