粵劇係珍貴文化傳統，不過香港高官唔識貨，所以好多人認為本地粵劇發展被扼殺，立法會噚日討論發揚粵劇文化問題，會議由民建聯蔡菜子做主席，由於好多議員已離港提早放復活節假，所以只得兩個議員開會，後來閃埋，剩番蔡菜子一個人同幾個官員「對談」。
蔡菜子話北角新光戲院唔可以永久做落去，一旦新光摺埋，香港島就冇粵劇表演場地，港島戲迷要睇劇，就要過九龍甚至去新界，佢認為政府唔可以咁偏心，應該喺港島搵地方供粵劇表演。香港島冇廸士尼樂園，九龍冇海洋公園，新界區冇紅館，根據蔡菜子思路，香港、九龍都應該興建廸士尼，天水圍就要有個新紅館，如果蔡菜子成功爭取，八方樂觀其成。