李嘉欣同許晉亨嘅恩愛癡纏，真係癡到你唔信。日前本報至拍得嘉亨去跑馬地快活谷happy，去馬場拍拖散步，情到濃時仲當眾濕吻。點知前晚嘉亨又嚟真人騷，去銅鑼灣富瑤酒家撐枱腳，二人十指緊扣，煙韌到不可分割。
頻展笑顏
前晚9點鐘，嘉亨已經到達富瑤開餐，嘆足個半鐘雙雙離開，當時酒家職員一開門，嘉亨已拖手步出，亨亨身穿疑似日前喺馬場着過嘅條子恤衫配深色西裝嘅茄輪裝，嘉欣就牛記笠記，披米白外套、孭住個黑色手袋仔，兩個人一見記者即時展現笑容，表現大方。
現場有記者話嘉欣同男友日前喺馬場嘅舉動好sweet，嘉亨聽見後齊齊笑到嗒晒糖，再問佢哋係咪好事近？嘉亨只係嘴角含笑，不約而同唔出聲，超有默契，記者叫嘉亨有好消息時記得話畀大家聽，佢哋繼續但笑不語，嘉欣仲面帶羞怯㖭。
其後嘉亨登上男方Audi座駕，司機為嘉欣開車門，亨亨就好有風度咁等女友先上車，自己至尾隨上車廂後座，但嘉亨一坐定，又即刻十指緊扣黐番埋，女方仲有意無意間展示戴喺左手無名指嘅鑽戒，甜蜜樣滲到出面，確係羨煞旁人。