OpelSUV挑戰X3　寧靜越野

城市SUV又再興番，好多歐洲品牌已推出多款型號，一直按兵不動嘅Opel終於出招，新到嘅Antara配搭落斜免煞掣同超強隔音功能，相當有新意同賣點。其外形、規格到裝備仲要同寶馬至熱型號X3相近，價錢更平多十幾萬，擺到明狙擊X3。

記者：徐影龍
攝影：譚盈傑
Model：Fion

女仔飛市區

Opel一出招，唔係縮吓縮吓試市場，而係落足重料挑戰寶馬X3！首先車形符合城市四驅設計，斯文中不失霸氣，凸出頭冚線條配襯泵把護柵，車首已充滿力量感，車身雖沒有太多誇張線條，但跟車首卻出奇配合，女士們揸起上嚟都唔覺突兀，並非如大隻壯男揸粗獷越野車咁Man。講開女仔揸車，城市四驅其實好揸過私家車仔，由於車身高一線，睇位泊車、抽頭Cut線等會易好多，對掌握馬路狀況亦更清楚。
一路試揸，首先要一讚其隔音系統造得相當好，喺鬧市中塞燈位、甚至巴士貨車駛過，都唔似其他單薄車殼般嘈夾震，最啱喺車內靜靜享受心愛音樂，尤其喺假日遊車河減壓，車內寧靜相對地重要。

■18吋五輻式鋁合金輪圈，感覺硬朗。

落斜自動收車

今時今日越嚟越多女仔揸車，七人車越縮越細部就係攻呢類市場，SUV都唔例外，太大架對女仔始終係考驗，所以Antara喺操控上下了不少心思，除整體操控靈敏易揸外，仲新加入DCS（下坡自動收Brake系統），啓動後電腦會自動計算斜度及速度，幫你間歇性收緊Brake碟。筆者搵條超斜山路實地測試，啓動DCS後專登唔收Brake，架車傳出幾下轟轟重Brake聲，感覺有如平路着咗ABS般，收車效果比啓動O/D更顯著。對大頭蝦人士嚟講，能杜絕落斜踩死Brake而Overhit之危。但平心而論，筆者就唔太喜愛此功能，因為拖波及O/D作EngineBrake已足夠，不喜歡突如其來之轟轟聲，相信不少有經驗駕駛者亦不會啓動此功能。

■筆者上到畢拉山頂，又斜又窄嘅山路一樣操控自如。

■泵把下方之灰銀色護柵，跟車身形成強烈對比。

■遇到架車轟轟聲，唔使驚，只係DCS自動收車啓動咗啫。

■要啓動或關閉DCS必須在停車狀態，行車時不可隨意按動。

騎呢尾架實用唔礙眼

車上設備比想像中還豐富，尤其針對戶外活動之用，尾廂變化相當之靈活，一個儲物網可直放或橫放，可拆式尾架能輕易拉出一層專放輕便物件嘅層架，擺褸擺公仔一流。至於頂架已屬指定動作。最驚喜係Flex-Fix功能，在車尾底部伸出鐵架，足可穩妥擺放兩部單車，唔用時亦可完美收起，毫不影響車身外觀，相當之體貼！可惜到港之Antara屬標準版，呢類Option需預訂，否則實地測試有更多嘢玩。
性能方面，未能實試其四驅表現，皆因大部份時間均以頭輪驅動，若遇到真正Off-Road（如泥氹、沙灘）才會啓動，馬力上雖未有爆炸性驚喜，一如3.2V6之表現，但以都市人嚟講，非恒式四驅反而更慳油，無謂平路都用四驅咁浪費吖。