政府宣傳片成日有教，男又好女又好，最緊要好好保護自己，有事記住大聲嗌唔好，不過語不驚人死不休的19歲𡃁模Angelababy（楊穎）卻是「鱷魚頭老襯底」，試過在餐廳遭陌生男人索電話，她竟將號碼如實相告，好彩冇出事咋！
現年19歲的人氣𡃁模Angelababy與組合SunBoy'z成員陳偉霆（William）愛得高調，不過隨着知名度越來越高，女方也開始懂得保護自己，堅稱冇拍拖，不過有人追咁話啫！現時索爆的Angelababy，其實也經歷過「醜小鴨」年代，早前網上流傳她昔日的薯妹look照片，擺明與「索」無緣，但一樣煞食。
計劃30歲結婚
Angelababy說：「大約13、4歲嗰陣，有次我去一間餐廳，有個男仔走埋嚟，問我叫乜嘢名，有冇興趣一齊出街，又問我攞電話。當時我好緊張，唔識點拒絕，於是就畀咗個冧巴佢。」當年的她只懂留自己的電話給對方，卻沒索取男方的電話，儍得出奇。
半熟少男事後果然有致電Angelababy，她說：「佢打畀我，想約我去街，我話唔好喇，推咗佢，之後佢冇再打嚟。讀書嗰陣都有男仔寫情信或者送公仔畀我㗎，不過自從入咗行之後就冇晒喇，可能佢哋覺得我做咗model之後，佢哋冇晒機會啦！」
至於終身大事問題，Angelababy有滿腹大計，她說：「我希望30歲左右結婚，然後生BB，因為我驚同小朋友有代溝，最好生夠4個，兩男兩女，第一個要係仔，等哥哥可以照顧妹妹。」
渴望唱歌拍戲
距離結婚生仔還有11年，現在當然努力要為事業衝刺，雖然如今出入有保安及工作人員護航，明顯得寵，但Angelababy目標不止於此，她說：「香港係一個好大嘅市場，有好多唔同嘅機會，又可以去世界各地同內地發展，而且我覺得其實model都可以唱歌拍戲呀！」一齣《破事兒》令Angelababy人氣急升，小小年紀已抓緊成名之路。
Angelababy與天王嫂兼名模熊黛林份屬同門，談到這位師姐，她說：「佢身材好正，又高又靚，仲有前有後，佢有今日嘅成就係佢應得嘅，不過我都好滿意自己嘅身材。」讚人之餘不忘捧自己，Angelababy確係醒。
採訪：吳佩思
攝影：林德雄
場地、服裝：mi-tu
