郭羨妮（Sonija）前排因為同陶大宇傳緋聞，形象直插谷底，仲俾人封為狐妮，主演嘅劇集《學警出更》收視又麻麻，搞到有段時間見唔到佢嘅蹤影。Sonija最近終於逃出生天，有新劇出街，噚日佢就同郭晉安、曾華倩同馬國明等，一齊喺尖沙嘴宣傳無綫新劇《古靈精探》。
華倩馬國明避忌
雖然有人擔心冇乜觀眾緣嘅Sonija會拖累《古》劇嘅收視，不過安仔一啲都唔擔心，佢話：「有人話生仔有運行，所以我有信心雙喜臨門。」佢仲話如果生咗BB，會第一時間通知Sonija，幫佢冲喜吓喎。Sonija就話只想帶娛樂畀觀眾，其他嘢唔會理，佢仲同公司反映話想做多啲慈善活動，要對社會負責任喎。
曾華倩同馬國明呢對緋聞男女，同台宣傳冇交流，反而張海報就將佢哋拉埋一齊。馬國明話覺得奇怪，事關佢哋喺劇入面冇乜對手戲，可能宣傳方面要製造話題。華倩就話：「唔好再講呢個話題啦，好悶呀。」