馮國經送本中藥書畀太座，可見佢幾錫老婆。原來錫老婆嘅唔止佢一個，仲有交通銀行（3328）董事長蔣超良。華華點解會知？因為佢叫太太買「很不錯的」銀行股囉！
呢排內地好多買咗銀行股嘅散戶，因為股價下跌而變咗大閘蟹，噚日有記者問蔣超良點睇呢件事，佢就話：「我會跟我太太說，銀行股是很不錯的。」即係話，佢睇好銀行股，因為唔係好嘢，佢絕對唔會叫老婆放錢落去投資，又借埋太太過橋，回應記者有關銀行股表現唔多理想嘅問題。
除咗肯定蔣總係個好老公之外，華華仲好肯定佢絕對係個優秀嘅管理層，事關佢有份管理嘅交行，啱啱俾美國金融雜誌《環球金融》選咗做「中國本土最佳中小企業融資銀行」，證明佢管理有方。蔣太太有個咁錫佢又咁能幹嘅老公，真係三生有幸！