舊時黃飛鴻靠打猩猩王為樂，香港早前亦有「猩猩王」鬧得滿城風雨，但德國「猩猩王」簡尼卻係殿堂人物，連德國足總都破例幫佢喺搞告別賽致敬，希望一蕉傳一蕉；不過，求大俠心諗呢隻「蕉」可以傳畀邊個呢？
德足總辦告別賽表揚
因外型酷似人類始祖猩猩，加上周不時嘅場中咆哮，作客甚至俾球迷掟過蕉，令拜仁慕尼黑門將簡尼迫於無奈被封為「猩猩王」；該前德國國家隊守護神，早就宣佈本季尾掛靴退隱，而足總為表揚其多年汗馬功勞，周二宣佈會喺9月2號搞場德國對拜仁嘅紀念賽，送佢一程！簡尼獲悉非常感動：「言退並非易事，但我相信那天會是美麗嘅一晚。」
簡尼乃德國02世盃亞軍功臣之一，更榮膺金球獎；可惜歲月催人，06世盃，阿仙奴門將列文坐上第一把交椅，佢亦深明日落嘅日子不遠矣。
人大了，但38歲嘅簡尼演出反而平穩過對上兩年，球隊喺23場德甲中僅失11球，打破球會史上同期失球紀錄，並向不來梅喺87/88賽季單季失22球的紀錄邁進，「猩猩王」收起粗豪道：「我有信心可寫下新紀錄，而今季亦係我穿起拜仁球衣以來，防線最好嘅一季。」
路斯紐亞希廸布蘭接棒
古來尋「蕉」幾人回，令人欷歔係環顧德國門神名單，簡尼手中隻蕉似乎搵唔到後輩接。同係38歲嘅列文當然唔係長遠計，而新一代中，僅得漢堡門將路斯、史浩克04嘅紐亞同埋華倫西亞嘅失魂龍門希廸布蘭有啲機，你話叫唔叫德國迷心慌？連求大俠呢個旁觀者，都唔敢話德國鋼門傳統可以繼承下去。「猩猩王」你退休之後，不如去山旮旯搵隻「新猩猩王」嚟守龍啦！
你的意見?
德國門將真是後繼無人？
請上 http://hk.myblog.yahoo.com/appleballmen/〈球蘋家〉留言