胡錦濤接見港澳區人大政協，與范徐麗泰握手時間最長（以秒數計），與許仕仁握手最為親切（輕拍肥龍手背），以此觀之，范太做人大常委，許老爺做政協常委，相信會好穩陣。
胡錦濤致詞時，談到港澳同胞捐款賑災，幫助國內雪災災民，兩度向人大政協鞠躬，據講各位港澳代表甚為感動，胡總的政治手腕確是高人一等。香港人捐款其實是否足夠？好似捐款早已超過一億元。演藝界人士與各大電子傳媒曾經密鑼緊鼓，卜咗香港大球場做大騷，由朝唱到晚上十點（類似八九年演藝界在馬場演唱籌款支援天安門學生），籌款捐助災民，整個計劃得到特區政府支持，西環拍板，但籌備工作進行到如火如荼之際，突然所有宣傳短片失蹤，義演胎死腹中，無人再提。點解會咁？一位港台中人話畀左丁山聽，中央唔鍾意喎，密令西環收口收手，唔好再搞籌款，以免影響中央面子，等外間以為中國即使收埋一萬五千幾億美元外滙儲備，仍然無法為雪災善後，兼且奧運舉行在即，一切以宣傳和平和諧安定繁榮為主，不容香港人在大球場製造中國雪災悲情。
嗱，捐錢都要睇政治氣氛㗎，唔好自以為捐錢報國就會得人欣賞，最緊要睇清形勢，適可而止。香港演藝界好識睇中國市場潛力，有機會表演報國，便不甘後人，可惜行慢咗一步，報國無門，搞手冇癮矣。
中國已處於發展過渡轉型期，即林毅夫教授所指嘅DevelopmentinTransition，中國過去三十年，從一無所有，全民均窮而發展至擁外滙萬幾億美元嘅社會，有人成為世界級富豪，仍有人一貧如洗，好似上海市委書記俞正聲感嘆今日上海竟有居民活在「水深火熱」、「暗無天日」嘅環境中，中國已進入轉型期，以後嘅經濟發展會唔會受僵硬政治體制拖住後腿呢？會唔會經濟發展太快逼使一黨專制轉型呢？轉型期間，如何解決貧富懸殊，物價高漲呢啲問題呢？真係好想聽世銀首席經濟學家林毅夫喺三月三十一日在中大嘅演講，傳聞佢有意藉世銀平台，向全世界推廣中國發展模式，佢嘅意見過往係學者之言啫，但今後身份唔同，會對世界有影響，值得重視。