拉闊生活：<br>賓尼兔　夠嗲醒目最得寵

拉闊生活：
賓尼兔　夠嗲醒目最得寵

曾幾何時做大家姐最慘，被迫放棄學業搵工擔起頭家，養活一班細佬細妹；今時今日作為大家姐邊有呢支歌仔唱，食得好、住得好，仲要蝦蝦霸霸恰班𡃁。係！無講錯，呢個咪係我──囡囡囉！一隻美艷如花的三色賓尼兔，我係擺款恰人，但鬼叫我又嗲又醒目，最得爹哋媽咪歡心咩！

記者：區佩嫦
攝影：譚盈傑
鳴謝：荷里活廣場、香港兔友協會

囡囡（3歲，三色短毛賓尼兔）
大家姐，平時蝦蝦霸霸，但最得主人歡心。

糖糖（3歲，貓貓兔）
外形似史納莎，主人一叫就即刻走埋身。因無門牙，食草要慢慢「梅」。

天天（1歲半，賓尼兔）
天生矇豬眼，一副瞓唔醒嘅樣，成日望街扮型，其實係撞聾。

Soba（5歲，賓尼×獅子兔）
有對黑眼圈和鬍鬚，亦有白內障，幾隻指甲又壞死，現等人領養。

小V（4個月，短毛賓尼兔）
身形成隻豬仔咁，超驚青，一有人時就匿埋，同Soba一樣等人收養。

小丸（6個月，長毛賓尼兔）
活潑貪玩，因前主人成日幫佢冲凉，搞到甩晒毛，待人領養。

魅力沒法擋

我叫囡囡，下月即將3歲，爹哋Raymond和媽咪Yuki當我如珠如寶，集萬千寵愛於一身，即使我有五兄弟姐妹，但我，先係主人掌上明珠！記得兩年幾前，我仲喺愛護動物協會呆住等人收養，好彩遇到爹娘，先可上樓住大屋。自從收養我之後，佢哋已無再睇過戲、出過街食飯。無法啦，鬼叫我魅力沒法擋咩！

■Yuki和Raymond要夾到實，才可影張全家福。

屙尿狂咬霸地盤

因為我係第一隻登堂入室嘅兔女，所以全屋我最惡。我有私家屋和廁所，但其他兔仔就只可住籠。每晚開餐，我一定要食先，食完先至到細佬妹。食飽之後我會喺客廳玩，梳化、咕𠱸都係我地盤，仲有晒我嘅體香、牙痕和尿迹（霸地盤），最重要係其他兔仔都無呢個特權。試過有次天天糖糖踩入我地盤，最後被我以牙抵抗，咬到爆缸，以後佢哋見到我都兜路走！

■訪問中Yuki抱住囡囡唔放，女王地位誰可代替。

■囡囡無時無刻不在洗白白，一洗就5分鐘。

有潔癖唔污糟

我雖然霸王，但天生醒目，聽教聽話，識嗲阿娘，即使阿娘去咗廁所，我都會企喺廁所門口等佢出嚟。阿娘話我最抵錫係識自己去廁所，唔會搞到周圍係便便。當然啦，我有潔癖㗎，每日好似貓咁舔手仔腳仔冲凉，保持清潔。

■Yuki專登搵人將囡囡個樣畫喺個袋上，要四嚿水㗎！

■4隻兔仔上晒梳化大混戰。

烏冬暴斃　阿媽喪喊

媽咪好有愛心，養咗我後再收養埋天天和糖糖呢兩隻殘障兔。天天天生撞聾，叫極都無反應；糖糖就因上手主人照顧不善，搞到上下門牙要剝晒，得番兩隻小牙仔。同屋仲有Soba、小丸和小V，全部都係暫住，等待好心人領養。爹娘好有愛心，呢兩年差唔多接待過二十多隻待領養兔仔，其中最有印象係叫烏冬嘅白兔女，佢嚟咗屋企無耐，唔知點解突然有日唔郁，走咗去賣鹹鴨蛋，阿娘仲喊足成晚，真慘情，令我好心痛呢！

囡囡私家用品