港股噚日再次出現單日轉向，恒指以全日最高位收市，嘉賓同主持都認為港股有轉勢機會。
沈：沈振盈 孫：孫柏文 玲：楊慧玲
玲：大師你近期話可以開始建立好倉，點解呢？
沈：上星期港股累積跌1830點，大市去番技術性支持位，公司公佈嘅業績反映股價喺合理水平，所以短期內淡倉要收手，開始可以睇番好啲。
玲：你講過滙控（005）係入貨首選，但近來已經升唔少，仲入唔入得？
沈：過去兩年冇乜點升，股息回報率5.8厘抵買。
孫：熊市博反彈，呢排炒緊抗通脹，資源股有冇機會炒落後？
沈：資源股近期弱勢要挨。博反彈要留意強勢、資金主導嘅股份。
港鐵公司（066）
長揸唔驚唱淡
深井葉先生32.5蚊買入港鐵公司（066）同佢嘅call輪（4544），見大行報告唱淡，猶豫好唔好減持。沈振盈教路，唔需要受報告影響，最重要係睇隻股嘅基本因素。
沈振盈話港鐵近月走勢強勁，有資金買入，現價仲未反映真實價值，短期有望升返去32蚊，中線睇35蚊。至於隻call輪，除非正股跌穿28蚊先要走，否則可以睇到4月。孫柏文就認為港鐵係長揸股，揸正股會好啲。
--深井葉先生個案--
買入價：32.5元 目標價：-
止蝕價：- 時期：一個月
中電信（728）
現超賣有得炒
大埔關公建議以現價5.71蚊買入中電信（728）原因係估值合理同埋超賣。沈振盈認為策略合理，因為佢重組後如果仍然做流動電話業務，有增長前景。
沈振盈估計呢隻股兩、三個月內應該可以升到8蚊，同滙控一樣同樣係值博首選。楊慧玲擔心短期個市波動，質疑值唔值得長揸。
沈振盈建議可以喺6.2至6.4蚊先沽一半，留一半睇遠啲。孫柏文話呢隻股走勢的確係幾靚，有好多friends都買咗。
--大埔關公建議--
建議買入價：5.71元 目標價：6.3元
止蝕價：5.2元 時期：短炒
