因旅遊節目《雪映移城》人氣急升的裕美，前日在《蘋果》網站直播節目《娛樂開CHAT》，大爆童年陰影。她自爆幼時曾被朋友出賣，長大後自信心也大減，不容易相信別人，所以去年與一班樂壇新人成為朋友，實屬意外。
裕美對於被指與江若琳爭陳柏宇，大搞三角關係，她尷尬地否認。當讀者問到環顧同期異性新人中，那位符合她的擇偶條件，自稱神婆的她指論外形會挑洪卓立，但論星座的匹配度，反而與小肥及緋聞男友陳柏宇較夾。
最近接拍了王晶新片的裕美，戲中飾演任達華的女兒。曾擔心哭不出來的她感激華哥帶她入戲，拍攝過程非常順利。大家可登入《蘋果》網站 http://ent.appledaily.com隨時重溫節目。
採訪：林惠卿、懷鈺
攝影：陳慧安
赴日發展盼變步姐
阿軒 荃灣
阿軒：我知你就快出碟，心情點啊，緊唔緊張？你之後可能去日本發展，有冇呢個心理準備？
裕美：日本發展緊張啲，至於香港出唱片呢，因為我上一年已經出過一隻，都試過感覺係點，應該冇第一次咁緊張。不過都好開心，一來係出第二隻唱片，二來啲歌同第一隻唱片係完全唔同嘅。第一隻唱片係以開心歌為主，而第二隻碟嘅歌曲係有啲難度。
主持：咁你期唔期待隻碟出呀？
阿軒：當然期待啦，我好想裕美有好似濱崎步咁嘅地位。
吊威吔周身傷痕
阿強 荔枝角
阿強：想問你套電影拍完未呀？
裕美：未拍完啊，仲有幾場就拍完。
阿強：咁幾時會上映啊？
裕美：呢個我都未清楚，但最近拍嗰場就好深刻，因為我要吊威吔，我覺得好好玩。不過我嗰次要拍天光，第二日返到屋企先發覺成身有好多一條條傷痕，唔係因為有少少痛，我都唔知道，因為太投入，太好玩喇！
阿強：咁你啲傷𠵱家好番未啊？
裕美：𠵱家唔覺得痛，不過仲有啲未走嘅痕喺度，但冇乜事，唔使太擔心。
大頭洪卓立外形襯
Man 黃大仙
Man：頭先你哋傾開陳柏宇同洪卓立，佢哋邊個最接近你擇偶條件？或者揀其他新人都得。
裕美：哇……好驚啊！如果真係要揀，我會揀洪卓立，因為我鍾意個樣比較得意，同白白淨嘅。另外有樣好處，就係我個頭其實比較大，洪卓立個頭其實都大，企佢隔籬我就唔係好驚，因為係balance嘅一件事，所以如果講最接近，應該係佢。如果性格上，同洪卓立做朋友就好好多，我哋年紀差唔多。另外就係，我哋星座就唔係好夾，我唔記得佢係乜嘢星座，但我記得係唔係好夾。如果講傾得埋偈，我覺得Jason（陳柏宇）同小肥會夾啲，因為Jason同我同一個星座，傾工作、難題會好啲。
Man：講開朋友，你會以乜嘢標準嚟同佢做朋友，邊啲會同佢交心，點解會同佢交心？
裕美：其實我乜嘢人都會樂意同佢交朋友，我自己以前唔多朋友，所以我自己好想去增加多啲朋友，令我生活圈子大啲。我乜嘢朋友都交，同佢傾偈嘅時候，我會迎合番嗰個人鍾意講乜嘢、嗜好係乜嘢，但如果真係講心事，我會搵番比較近身嘅朋友去傾。
