這個演唱會，賣點也許叫做錯置：金像作曲家金培達做司儀，和音擔正唱Melody，天王天后麻煩返落台做觀眾，完全主配大兜亂。由9男女組成的專業和音團唱過徐小鳳、又唱過Twins，玩到ACappella全不意外，反而是近年常肩負重任為國為港譜奏樂章的金培達，客串串場插科打諢，甘做阿四負責於演唱會整幾段疑似爆肚給大家嘆吓就有點估你唔到──若說綠葉雖好都要有牡丹扶持，咁金培達做司儀呢件事又有幾牡丹呢？「其實走音好正常，因為人唔係機器，冇可能粒粒音都準，不過𠵱家樂壇唱歌嗰批，好多唔係間中走音，係間中準音！」哇，真係金人金句，YouareReady！
記者：劉嘉蕙
攝影：王文忠
9男女 即興清唱
何謂真正音樂人呢？我如此理解：Stephy上《勁歌金曲》唱自己歌，隻歌斷估前後唱過100次吧，尚會走音；跟和音團做1小時訪問，雖不至於仙樂飄飄處處聞講句嘢都係歌，不過A君隨口哼一段旋律，BCD君自動和唱等場面出現亦實屬好閒，即興自在的Improvisation，音樂底弱少少都好難玩得起，更猛料之處在於──9男女本身其實唔係十分熟，宣傳海報連齊人相都冇張！「香港的和音多以Freelance形式接工作，歌手演唱會好多時只用2、3名和音，所以行內都唔係成日撞到，更少機會夾歌。今次係我忽發奇想，覺得幫人唱咗咁多年和音，很少有機會做真正的演出，所以想做一個Concert，主力清唱，讓一班愛唱歌又唱得好聽的和音，齊齊玩齊齊Enjoy。」發起人劉祖德說。
個個猛 畀品味人聽
雖云逢場作興，不過叫得上台一齊玩的，自然不是以為唱歪些就叫和音的街邊阿茂。9男女大起底，個個是資歷起碼10年的資深音樂人，加埋包辦差不多全行演唱會，幅度橫跨20年，「90年代初飛圖、寶麗金好興出卡拉OKLCD碟，好多非旗下歌手的Track都要另外找人配唱及和唱，試過一日錄20幾隻歌！」團中資歷最深、人稱禧哥的譚錫禧入行超過25年，和盡樂壇黃金時代每位巨星，廣告歌也唱過百多首，包括25歲以上實識的《搵工跳槽》黃頁之歌、以及25歲以下都有留意過的《頭髮發放色彩》Gatsby之歌（唔係木村拓哉嗰隻！）。禧哥近年是張偉文演唱會一大主將，幾位樂壇新人王如方力申、Juno都經他調教。假如閣下是會花真金白銀買正版唱片的良心樂迷，對其他8名唱將的名字亦不會陌生，除了因為歌詞集Chorus部份出現過N次之外，入面幾位如柳重言、劉祖德都是知名幕後人，後者熱作包括《愛情萬歲》及《愛你變成恨你》，前年更推出《自己唱翻》大碟做唱作歌手。難怪禧哥自信道，「呢個Show係畀有Taste嘅樂迷聽。」金培達也粉墨登場做阿四，「我初入行都唱過兩年和音，徐小鳳演唱會都有份唱，所以同班和音特別有默契，不過今次我角色主要搞氣氛，適合先唱兩嘴。」
我做我的綠葉
老實，做和音，有歌唱、有演唱會睇、又唔太需要拋頭露面，何嘗不是筍工一份？本欄不是職業介紹所，無意詳列做和音3大條件5大福利，也正如和音團話齋，做和音其實冇入行途徑可言，全靠「咁啱識人」。訪問當天唯一出席女將阿銀披露入行經過，「參加歌唱比賽，識咗監製，佢搵我唱Demo，跟住矇查查做和音。」和音出天后，例子有彭羚、衞蘭，但阿銀說唔係個個綠葉都想做牡丹，「反而係見得多，知道佢哋太多辛酸，不會有Fantasy。」和音的意義，在於成就音樂、豐富篇章，上台表演，雖無Spotlight射住，也絕非睇睇譜唱唱歌咁簡單，「最Enjoy做憶蓮個Show，她很少失準，倫永亮個人好好笑，而且大家都很投入，感覺就好正。但平日做Live，很多時都要幫歌手執生，歌手唱錯段數，成隊Band同Chorus就要跟住佢轉。」即係變成成就歌手，「呢個就係和音嘅本份。」靠把聲搵食，歌手們好大件事，又打開聲針又食藥，「我哋冇，都冇法寶，講少啲嘢就唔傷聲啩？」眾人異口同聲。唱K也自動和音？「係好少唱K，你習慣在專業器材底下唱歌，就不會喜歡在K房裏唱。」Allan說。
從9和音到走和音
打開報紙，10個有9個鬧香港樂壇，歌手在頒獎禮上句句救亡，但表面睇嚟依然極盡風光，實在歌手有幾識唱歌，和音最有資格講，「唱Live時頭上戴住耳機，最入耳都係Artist把聲，有時真係聽到第一粒音就火滾！」團中最敢言的禧哥說，「不過最近出咗新科技，可以Mute咗個主唱Vocal，簡單講係和音界嘅福音！哈哈哈！」不會「聽」化？「冇可能，如果你鍾意音樂，唔會鍾意聽到隻歌俾人唱到咁。」劉祖德說。音樂整體製作水平下降，從和音人數亦可得到反映，禧哥說徐小鳳年代一場Show閒閒哋用8、9個和音，一隻碟12隻歌，1隻4個，現在許多大碟都會「走和音」，或亁脆用電腦合成，演唱會和音小組得番2、3人，金培達說演唱會過份側重視覺，是非常不健康的現象，「演唱會Budget有限，一隊Band要Cut人，第一時間一定Cut和音，因為鼓呀、結他呀，都叫擺喺度有啲嘢睇。就算有錢，通常製作公司都用嚟搞Visual，整煙花、搞舞台效果、造歌衫整頭，甚至跳舞都緊要過和音，因為第二日傳媒其實都只係寫呢啲嘢，你睇近年演唱會報道，幾時有人話過隊Band正呀？而為咗搭台、練舞，成個Band又少咗時間綵排，直接影響演出水平。𠵱家做演唱會，都係娛樂為主，好少人注重真正『演唱』部份，其實都幾怪。」
專業和音清唱會
日期：3月22日及23日（8:00pm）
地點：香港理工大學賽馬會綜藝館
票價：$180、$280
查詢：37412011