入汽油嘅車叫汽車，用電嘅車叫電車，但入汽油嘅單車就叫電單車！九唔搭八，嗌開就係咁嗌囉。不過最近有車行引入一架用電嘅電單車，外形如一般250羊格局，但打開座位就有條電線連住三腳插頭，叉4粒鐘電可以行80km。一上車，嘩！靜到着咗車都唔知，而且零排氣量、排氣喉無卜卜聲。畀油，唔係，係一畀電，「妖」一聲話行就行，嗰聲「妖」係指架車個摩打聲．．．．
撰文：嘴嚼爺
攝影：陳陶鈞
Model：Joan
叉滿電跑8轉東廊
講吓古先，香港曾經流行過一種要叉電嘅疑似單車，不過原來唔合法，所以最後絕迹江湖。今次呢部來自美國嘅Vectrix終於係一架真正電單車，車價近十萬，幾貴，但唔使入油可以慢慢慳番。每次插掣叉4粒鐘電，就可以行到80公里，夠你來回東區走廊4次。但問題嚟喇，唔通托架車入𨋢返屋企叉電？其實咁，車行話呢架車嘅主要對象係住獨立屋、樓下有車房嘅車主！
第二個關心問題，就係電單車夠唔夠力。一上車插匙一扭，無反應，又無撻車掣嘅？原來要起側架，拿住左右Brake，就着到車喇。咦，都係無反應嘅？扭一扭，嘩，架車即刻飆前，原來已經着咗車，只不過着咗車都唔覺。
起步無我架250羊咁有力，但都可以接受，因為無排氣聲同引擎聲嘈嘈閉，啲路邊行人都唔係好覺我嚟緊，要加倍小心留意。加速力唔錯，0-80km/h都係6.8秒，電單車嚟講唔算快，但燈位起步都快過好多四個轆。官方公佈話極速可以去到100km/h，不過車行員工就話淨係試過扭到80km/h左右。老實講，鬧市穿梭就一定夠用。
少有後波
夠靜夠環保之外，仲有抵讚之處，正常扭油向前行，反方向扭仲會向後行。除咗少量三個轆電單車同本田架「金翼」之外，一向好少電單車有後波，呢架Vectrix就有喇。後波其實好有用，真實個案，本人泊地庫停車場，有次隔籬線泊滿車，即係單線雙程啦，我落緊去時見有車上，就懶禮讓扭埋一邊讓佢行先，點知我扭咗去架死車車尾，唔夠位扭番出嚟。須知道當時係落緊斜，狼狽足10分鐘又拉又扯又驚揩花前面架車先解到圍，嗰一刻無助嘅我真係好希望架車有後波㗎。
外形上同街邊好多嘅250「墨汁」仔差唔多大，坐齊兩個人都好闊落舒服。由頭燈到車尾線條都好流線好大路，新式綿羊格局，值得講吓嘅係平凡外表中都加上電鍍裝飾，車尾及底部「引擎蓋」都可以點綴到車身。錶板速度錶好有型，旁邊有兩個LCD顯示屏，顯示行車資料及電量。不過講到最搶眼，我覺得就係少咗條排氣喉，望落好有新鮮感，仲減少咗香煎小腿危機。
Vectrix規格
傳動：無段變速
最大馬力：20KW/3,000rpm<20kw>
最大扭力：65Nm
車重：210kg
軸距：1,525mm
座高：770mm
查詢：富利堡（25880666）
